Aningaasanut ataatsimiitsitaliaq paasisaqarluarpoq
Akit assigiikunnaarnissaat pillugu inatsisartuni aningaasaqanermut ataatsimiitsitaliaq maannamut paasitinneqarluartoq, paasissutissallu amigaatigineqartut eqqissilluni suliarineqartut ataatsimiitsitaliap siulittaasua Ole Thorleifsen oqarpoq.
Taamaammat akit assigiikunnaarnissaanut siunnersuut sisamanngorpat inatsisartuni aningaasanut inatsisissamut ilanngullugu oqaluuserineqassasoq ataatsimiitsitaliamiit ajoriffissaqartinneqanngilaq.
Sapaatip akunnerata siuliani inatsisartut ataatsimiilermata inatsisartuni aningaasaqarnermut ataatsimiitsitaliaq piumasaqarpoq aningaasanut inatsisissap inatsisartuni siullermeerlugu oqaluuserineqarnissaa kinguartinneqartariaqartoq, akit assigiikunnaarnissaanut apeqqutit assigiingitsut qulaajarneqartariaqarmata.
Soorlu tusarniaanermi akissutit misissuataarneqarnissaat aningaasaqarnermut ataatsimiitsitaliamiit piumasaqaataalluni. Tamannalu akuerineqarluni aappaagumut aningaasanut inatsisissap oqaluuserineqarnissaa sisamanngorpat ingerlanneqartussaavoq.
Massakkullu paasissutissat pissarsiarisimasatik naammagisinnaallugit inatsisartut aningaasaqarnermut ataatsimiitsitaliaani siulittaasoq Siumumeersoq Ole Thorleifsen oqarpoq.
-Eqqissilluta akit assigiikunnaarnissaanut siunnersuut ilanngullugu, aningaasaqarnermut inatsisissaq misissuataarparput, paasissutissallu naamattut pissarsiarisimallugit isumaqarpunga, Ole Thorleifsen oqarpoq.
Taammaammat inatsisartuni aningaasaqarnermut ataatsimiitsitaliap siulittaasua isumaqarpoq, akit assigiikunnaarnissaanut siunnersuut ilanngullugu, aapaagumut aningaasanut inatsisissatut siunnersuut siullermeerlugu sisamanngorpat inatsisartuni oqaluuserineqartariaqartoq.
Aamma Siumup siulersuisuunerisa pingasunngorpat aatsaat akit assigiikunnaarnissaat pillugu isummertussaanerat kingusippallaartutut isigineqanngilaq.
-Siunnersuut siorna ukiakkullu oqaluuserineqalerpoq, oqallinnerit tusarniaanerillu ingerlanneqareerlutik. Taammaammat Siumup siulersuisuunerisa pingasunngorpat ataatsimiineranni ataatsimoortumik oqariartuuteqarnissamut isummernissaq kingusippallaartutut isigineqarsinnaangilaq, inuiaqatigiilerineq pillugu immikkut ilisimasalik, Ilisimatusarfimmi iliniartitsisoq Daniel Thorleifsen oqarpoq.
Akit assigiikunnaarnissaat pillugu Siumup siulersuisuunerini ilaasortat ilaat isumaqarput, sinnersuut ukiortaamiit atuutinneqalernani ukiumik ataatsimik kinguartinneqartariaqartoq. Taamatullu isumallit ilaat, siulersuisuunerni ilaasortaq Tønnes Berhelsen oqarpoq siulersuisuunerni amerlanerussuteqartut isummernerat ataqqissallugu.
