Aningaasanoortartut killissamik qaangiisartut ajornartorsiuteqartut

Oddsinik aningaasanoortartut killissaminnik qaangiisuusut peqquserluttullu peqqutigalugit Brugsenip pisiniarfimmini aningaasanoortarnerit unitsittariaqarsimavai. Taamalu pissuseqarnerit pinngitsuuisinnaajunnaarsimanermi takussutissaasut, katsorsaasoq oqarpoq.

Aningaasanoortartup pisiniartitsisoq oddserniakkanik maskiinakkoortitsinarnera arriippallaarnerarlugu pisuutinneqarnera pinngitsuuisinnaajunnaarsimanermut takussutissaavoq. Oddsillu allagartaanik akiliinani peqquserlunnerit aamma pinngitsuuisinnaajunnaarsimanermut takussutissaavoq. Katsorsaavik Nuummi katsorsaasoq pisortarlu, Grethe Kramer Berthelsen KNR-imut oqarpoq. 

AAMMA ATUARUK Oddsertartut Brugsenimi akornutaajunnaalersut

- Pisiniarfinni taama pissusilersorsinnaaguni taava pinngitsuuisinnaajunnaarnermik ajornartorsiuteqarneranut tamanna takussutissaavoq, Grethe Kramer Berthelsen oqarpoq.

Taassuma oqaluttuaraa aningaasanoorajuut qanoq ilillutik qanorlu sukkatigisumik aningaasanik pissarsisinnaanissartik, taakkulu kinaassusaat allanngorsinnaasarput soorlu sakkortuumik pissusilersorsinnaasarlutik.

Taamaammat aamma taakku oddserlutik aningaasanoortartut kinaassusaasa allanngoriartorsimanissaat inuunerannillu ersinngitsunik ajornartorsiuteqalersimanissaat qularinngilaa.

- Nukissatik tamarmik pinngitsoorsinnaanngisaminnut atortarsimassagaat qularnanngilaq. Taakkulu nukissat meeqqanut, ilinniarnermut aappariinnermullu atorneqartussaagaluit pinngitsoorsinnaanngisaminnut atortarpaat, katsorsaasoq oqarpoq. 

Pinngitsuuisinnaannginneq ersinngitsoq

Aningaasanoorajoorneq annerusumik minnerusumillu ersinngitsumik pinngitsuuisinnaannginneruvoq, aningaasanoorajoormi hashimik imigassamilluunnit pinngitsuuisinnaanngitsutulli takuneqarsinnaanngilaq.

- Inuk aningaasanoornermik pinngitsuuisinnaannginnersoq atornerluitillugu naapinngikkaanni takuneqarsinnaanngilaq, Kramer Berthelsen oqarpoq.

Aammattaaq aningaasanoortarneq hashimik imigassamillu atonerluisunut sanilliullugu inuiaqatigiit akornanni akuerisaaneruvoq. Taamaammat aningaasanoortarnermik pinngitsuuisinnaanngitsup pinngitsuuisinnaannginnini takujuminaatsittarpaa.

- Inuit aningaasanoorneq hashimut imigassamullu sanilliuttarpaat oqartarlutillu aningaasoorfinni pinnguarneq aakoornermit ikiaroornermiillu ajunnginnerusoq. Taamaammat pinngitsuuisinnaanngitsup atornerluinini takusinnaanera ajornakusoortarpoq, katsorsaasoq oqarpoq.

Pisiniarfiit akisussaaffimmik tigusisut

Pisiniarfiit livemik oddsernermik matusinerminnut pisiniartut sulisullu illersorneraraluaraat, pisiniarfiit aningaasanoornermik akuersaannginnermut  peqataasut, Grethe Kramer Berthelsen isumaqarpoq. 

Grethe Kramer Berthelsen Katsorsaavik Nuummi katsorsaasuuvoq.

Erseqqissarpaali aningaasanoorajuut allatut atuinissaminnik nassaarsiorumaartut.

- Aningaasanoorajuttut aningaasanoornissamut periarfissanik allanik nassaartuaannarput, Grethe Kramer Berthelsen oqarpoq.

AAMMA ATUARUK Aningaasanoortartut ataqqinninngitsut peqquserluttartullu unissapput

Katsorsaavik Nuup pinngitsuuisinnaajunnaarsimanermik misilissutitut atortagaa uani misiliguk, paasillugulu qanoq inissisimanerlutit. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!