Brugseni: Aningaasanoortartut ataqqinninngitsut peqquserluttartullu unissapput

Nuummi Brugsenip pisiniarfiini live oddserneq, tassa unamminerni toqqaannartuni aningaasanoorluni eqqariaasarneq, iluatsilluartumik unitsinneqareernikuuvoq. Iluatsilluarneratalu Brugsenip pisiniarfiini sinerissamiittuni tamani live oddsinik matusinissamik Brugseni isumataartippaa. 

Live oddserneq aningaasanoorneruvoq, maannakkorpiaq unamminerni inernerinik eqqoriaaneq. Unamminerillu ingerlanerini oddset, tassa eqqugassat amerlassusaat, nikerartuartarput. Taamaammat oddsertartut unammisunik eqqoriaasimatillutik allattuiffissamut krydsileereeraangamik piaanerpaamik eqqoriaanertik atuutilersipallakkumallugu akileerusuttarput. Nuummi Brugsenimi niuertarfimmi aqutsisoq, Jes Nyborg KNR-imut oqaluttuarpoq. 

- Pisiniarfimmi pisiniat tunuleriiaassimagaangata inussiarnersumillu utaqqillutik, oddsertartut qaangeraaginnarsinnaasarput eqqoriakkatik piaarnerpaamik akilerumallugit. Tamannalu akuersaarneqarsinnaanngilaq, aqutsisoq oqaluttuarpoq. 

- Pisiniat kingulliunneqartarneri misilittagaqarfigaagut, aningaasanoortullu eqqoriakkatik inortorsimagaangamikkit sulisunut kusanaatsunik oqaatsinik atuisinnaasarneri aamma nalaattarpagut, Jes Nyborg oqaluttuarpoq.

Peqquserlunneq pisinnaasartoq 

Oddsertartut ataqqinninnginnerat kisiat nalaanneqarneq ajorpoq. Peqquserlunneq aamma nalaanneqartarpoq. 

- Aningaasanoorniarlutik allagartanik nammineerlutik maskiinakkoortitsisut nalaattarnikuuagut, naak taamaaliortoqaqqusaanngikkaluartoq. Live oddsillu matunngikkallaratsigit maskiinagut igalaanik assiaqutsersortariaqarnikuuagut, Nyborg oqaluttuarpoq nangillunilu;

- Oddseraanni minutsialuinnaat ingerlaneranni eqqoriaaneq inerneqarsinnaasarpoq. Eqqoriaallutik allagartamik tunniusseriarlutik maskiinakkoortereernerani aningaasaatiminnik biilinut qimatsisimanerarlutik aallertartut eqqoriakkatillu unioraangamikkit aggeqqinneq ajortut nalaannikuuagut. Tamannalu peqquserlunneruvoq.

Taamak pisoqarsimatillugu pisiniarfik allagartamik akilerneqanngitsumik peqalertarpoq tamannalu aningaasanik annaasaqaatigisarlugu. 

Brugsenip Nuummi pisiniarfimini live oddserneq siusinnerusukkut unitsinnikuuai, kinguneranillu ajornartorsiutit taakkartorneqartut nalaanneqassaarlutik, tamannalu pisiniarfinnut sinerissamiittunut aamma piviusunngussasoq Jes Nyborg oqarpoq. 

Live oddsip unitsinneratigut Kalaallit Nunaanni Brugsenip Danske Spilli aqqutigalugu isertitami sisamararterutai annaassavai. Tamannali pingaarnerunngilaq, tassami pisiniat sulisullu toqqissisimanissaat pingaarneruvoq, Jes Nyborg naqissusiivoq.