Aningaasaliisarfittut aningaasaateqarfimmik kissaateqarneq IA-p qaqeqqippaa
Kalaallit Nunaata aningaasaqarnera ilorraap tungaanut saatsinniarneqassappat, taava pimoorussilluni aningaasaliisoqartariaqarpoq - tamatumanilu aningaasaliisarfittut aningaasaateqarfik iluaqutaalluarsinnaavoq.
Inuit Ataqatigiit tunuliaqutaralugit folketingimut ilaasortaq Aaja Chemnitz Larsen taama isumaqarpoq. Taassuma aningaasaliisarfittut aningaasaateqarfimmik kissaateqarnini Danmarkimi aningaasanut inatsisissaq isumaqatigiinniutigineqalerpat saqqummiunniarpaa, KNR-imut taama oqaluttuarpoq.
Aningaasaliisarfittut aningaasaateqarfiliornissaq politikerinit inuussutissarsiortunillu namminersortunit, ilaatigut MT Højgaardip Kalaallit Nunaanni Savalimmiunilu pisortaanit Joannes Niclassenimit, ukiuni arlalinni oqallisigineqarpoq.
AAMMA ATUARUK Pisortaq: Aatsitassarsiornissamik pilersaarutit aningaasaateqarfinnit aallartisarneqarsinnaapput
Aningaasaateqarfik danskit naalagaaffiannit, soraarnerussutisiaqalernissamut aningaasaateqarfinnit aningaasaliisartuniillu anginerusunit, Kalaallit Nunaanni inuussutissarsiutitigut suliniutinik tapersersuerusuttunit aningaasalersugaanissaa anguniagaavoq.
Tamannali maannamut iluatsinneqarsinnaasimanngilaq. Kalaallit Nunaannimi naalakkersuinikkut aalassassimaartoqarnera aammalu Inatsisartunut ukiaq qinersisoqarnera pissutigalugu soraarnerussutisiaqalernissamut aningaasaateqarfiit Kalaallit Nunaat nangaanartoqartilersimavaat.
Aaja Chemnitz Larsenilli isumassarsiaq qaqeqqinnialerpaa.
- Aningaasaliisarfittut aningaasaateqarfiliornissaq Inatsisartuni amerlanerussuteqartunit ilalerneqareerpoq, akisussaaffeqarfinnilu amerlanerusunik siunissami Nunatsinnut nuutsitsisoqassappat aningaasaliisoqarnissaa isumaga malillugu pisariaqarpoq.
Danskit naalagaaffiata aningaasaliisarfittut aningaasaateqarfimmut toqqaannartumik aningaasaliinissaa ministeriunerusimasup Helle Thorning-Schmidtip upernaaq itigartitsissutigaa. Tamatumunngalu taarsiullugu kalaallit savalimmiormiullu suliffeqarfiisa aningaaseriviisalu danskit naalagaaffiata siuarsagassanut taarsigassarsiniartarfia aqqutigalugu taarsigassarsisinnaalernissaat Folketingimi akersissutigineqarpoq. Tamannalu ukiormanna juulip qaammataani periarfissaalerpoq.
Siuarsagassanulli taarsigassarsiniartarfik periarfissatuaasariaqanngitsoq Aaja Chemnitz Larsenip oqaatigaa, taassuma naalakkersuisunngortitsiniarluni isumaqatigiinniarnerni aningaasaliisarfittut aningaasaateqarfiliortoqarnissaanik kissaatini Lars Løkke Rasmussenimut saqqummiutereersimavaa.
Danmarkimi aappaagumut aningaasanut inatsisissap isumaqatigiinniutigineqarnera aggustip qaammataata naalernerani aallartinneqassangatinneqarpoq, Aaja Chemnitz Larsenillu ilisimatitsissutigaa Inuit Ataqatigiit inuussutissarsiornermut aningaasaqarnermullu tunngasut siornatigumut naleqqiullugit Folketingimi pingaarnerutillugit sulissuteqarniartoq.
AAMMA ATUARUK Danskit aningaasaliinerisigut Kalaallit Nunaata aningaasaqarnera pitsaanerulersinneqassaaq
AAMMA ATUARUK Aningaasaateqarfimmik pilersitsinissaq danskit kalaallillu ataatsimoorullugu siunnersuutigaat