Hans Enoksen: Aningaasakilliortut peqataanerusariaqarput

Innuttaasut 4 procentii 76.000 koruunit ikinnerusunik isertitaqartarput. Inuiaqatigiinni naligiinnginneq ajuusaarnartoq, taamatulli atugaqartut ajornartorsiutip iluarsiissuteqarfiginissaanut peqataanerusariaqartut naalakkersuisoq isumaqarpoq.
Hans Enoksen Assi © : KNR
Allattoq Ivik Kristiansen
decembarip 07-at 2017 15:34

Inuit atugaasa assigiinnginnerujussuat ajuusaarnarpoq, pissakinnerilli akisussaassuseqarnerusariaqarput.

Innuttaasut 4 procentii amerlanerit ukiumut isertitaat ataallugit, tassalu 76.000 koruuninit ikinnerusunik ukiumut isertitaqartartut nalunaarusiamit nutaamit takutinneqareersoq, inuussutissarsiornermut, suliffeqarnermut, niuernermut nukissiuuteqarnermullu naalakkersuisoq, Hans Enoksen taama oqarpoq.

- Soorunami ajuusaarnarpoq, taama assigiinngitsigisumik atugassaqartitsigatta, aamma atugaqaratta, Hans Enoksen Qanoruumut pingasunngormat oqarpoq.

AAMMA ATUARUK Innuttaasut 4 procentii inuussutissaqanngingajattut

Taanna naapertorlugu, suliffissaaleqisut pissakinnerusullu periarfissaasa pitsanngorsarnissaannut ilungersortoqarpoq.

- Assersuutigiinnarlugu Inatsisartut ukioq manna ataatsimiinneranni ilaatigut boligsikringimut tunngasut aaqqissuunneqarput, meeqqanut tapit qaffanneqarput, taamatullu aamma Majoriami ilinniartitaanerit kommunit peqatigalugit annertuumik qaffassarneqarput, Hans Enoksen oqarpoq, ilanngullugulu oqarluni, naligiinnginneq akiorneqassappat, ilinniartitaaneq qaffassarneqartariaqartoq.

Akisussaassuseqarnerusariaqartut

Ajornartorsiulli Naalakkersuisuniinnaq aaqqinneqarsinnaanngitsoq erseqqissaatigaa. Kommunit suleqataassapput, taavalu aningaasakilliortut akisussaassuseqarnerusariaqartut, Hans Enoksen isumaqarpoq.

- Taamatut atugallit aamma peqataanerusariaqarput, Hans Enoksen oqarpoq.

Suliffissaaleqisoqaraluartorlu suliffeqarfiit nunanit allaneersunik tikisitsisariaqartartut naalakkersuisup eqqaasitsissutigaa.

- Suliffissaaleqisut kaammattussavakka, aamma namminneq qanoq iliuuseqaqqullugit. Aasaanerani soorlu aalisakkerivinni allanilu sulisussat amigaatigineqartarput, taamaakkaluartoq avataaninngaanniit tikerartitsivugut. Ingerlaaseq taanna allanngussappat, sakkortunerusumik immitsinnut pisussaaffilerluta ingerlasariaqalerpugut, inuussutissarsiornermut, suliffeqarnermut, niuernermut nukissiuuteqarnermullu naalakkersuisoq, Hans Enoksen Qanoruumut pingasunngormat oqarpoq.