Aningaasaateqarnerulersimavugut

Immaqami taamaassimassaaq. Innuttaasummi isertitaat siorna 2016-imi, ukiup siulianut naleqqiullugu qaffassimapput. Kalaallit Nunaanni Naatsorsueqqissaartarfiup kisitsisaataasa tamanna takutippaa.

Innuttaasut 14-it sinnerlugit ukiullit 2016-imi isertitaat agguaqatigiissillugu tamakkiisumik 2015-imut naleqqiullugu 4,8 procentinik qaffassimasut kisitsisit takutippaat. Isertitat agguaqatigiissillugit 11.000 koruuninik amerlanerupput.

Innuttaasut isertitaat taamaasillutik amerliartortuarsinnarput, 2014-imili amerliartortuarsimallutik. Isertitat tamakkiisumik agguaqatigiissillugu 240.000 koruuniupput.

Ilulissani isertitat immikkut taaneqarsinnaapput, tassami tamaani isertitat qaffannerpaasimasut kisitsisit takutippaat. Isertitat tamaani 2016-imi ukiup siulianut 2015-imut naleqqiullugit 10,9 procentinik qaffassimammata. Iluliarmiup 2016-imi isertitai agguaqatigiissillugit 238.000 koruuniupput.

Qasigiannguani, Kangaatsiami, Upernavimmi Uummannamilu isertitat malunnaatilimmik aamma qaffassimapput, tamaani agguaqatigiissillugit 8 procentit sinnerlugit qaffassimallutik.

Nuummili isertitat qaffasinnerpaasut aamma takuneqarsinnaavoq, tamaani innuttaasut agguaqatigiissillugit 312.000 koruuninik 2016-imi isertitaqarsimallutik.

Qaanaami innuttaasut agguaqatigiissillugit isertitakinnerpaasut aamma takuneqarsinnaavoq. Qaanaami innuttaasoq agguaqatigiissillugit 2016-imi 137.000 koruuniupput, ukiup siulianut naleqqiullugit 1,4 procentinik apparsimallutik.