Aningaasaateqaraluarlutik akiitsoqalertartut

Innuttaasut ilaat aningaasanik amigaateqarnertik pissutigalugu akiitsoqalertarput. Ilaqarpulli aningaasaateqaraluarlutik akiliinngitsuuinnartartunik, Akileraartarnermut aqutsisoqarfik, kommunit aamma KANUKOKA oqarput.
maajip 20-at 2015 17:49

- Akiliineq ajortut ilaatigut namminneq piumassuserinngisaminnik akiitsoqalertarput. Kisianni aamma inupparujussuaqarpoq akiliisinnaassuseqaraluarlutik akiliinngiinnartartunik, KANUKOKA-mi pisortaq Hans-Peder Barlach oqarpoq.

Taamaakkaluartoq akiliisinnaagaluarlutik akiliineq ajortut qassiunersut, inuiaqatigiinnilu sumi inissisimanersut ilisimaneqanngilaq.

Aamma atuaruk Sermersuumi Qaasuitsumilu akiitsut amerlanersaapput

Kommuneqarfik Sermersuumiilli akileraartarnermut aqutsisoqarfimmiillu KANUKOKA isumaqatigineqarpoq.

- Periaaseq taanna ajoraluartumik nutaajunngilaq. Periaaserlu naggussimasutullusooq soorlumi ittoq, Akileraartarnermut aqutsisoqarfimmi pisortaq Kim Neumann oqarpoq, ilanngullugulu oqarluni akiliisinnaagaluarlutik akiitsoqaleriartortartut pillugit piffissamik atuisariaqartarnini ajuusaarutigalugu.

Inuiaqatigiit pisortanut 932 millionit koruuninik maannakkut akiitsoqarput. Taakkunanilu meeqqanut akilersugassanut, akileraarutit A-t eqqaavilerinernut anartarfilerinernullu akiitsut amerlanerpaallutik.

Aamma atuaruk Pisortanut akiitsut amerliartupiloortut

Pissutsit taamaannerannut suna pissutaanersoq eqqoriaruminaatsinneqaraluartoq, Kommuneqarfik Sermersuup akiitsulinnut sakkortunerusumik periaaseqalernissartik isumaliutigaat.

Qaasuitsup Kommuniani borgmesterip Ole Dorphip inuiaqatigiinni ajornartorsiutaasoq ersersinniarpaa, innuttaasullu ilaat aningaasaqarnissaminnut pikkorinnerulernissaat ujartorlugu.

- Inuit amerlasuut aningaasat atornissaannut pikkorissartinneqarnissaannut soorluuna takusinnaallugu pisariaqaleraluttuinnartoq. Inuit ilaasa aningaasat atornissaat nalusarpaat. Aningaasat iseraangata ingerlaannaqqinnaaq atortarpaat, Ole Dorph oqarpoq.

Aamma atuaruk Misileraanikkut akiitsorpassuit ikilisarniarneqassapput