Eqqartuussineq: Angutit sisamat toqutsisimasutut unnerluutigineqartut
Suliaq ukioq manna januaarip 16-iani aallartippoq, Danmarkimi illoqarfimmi Skagenimi angutip 20-nik ukiullip nassaarineqarnerani politiit ambulancelu aggersarneqarmata.
Angut pineqartoq anaalerutit assigiinngitsut atorlugit anaalerneqarnermi qitimigullu savimmik tallimariarluni kapineqarnermi kingorna aqqunartitersimaqaaq. Angutillu 20-nik ukiullip aqqunartiternini ullut marluk qaangiummata toqqutigaa.
Angutit sisamat, piffissami pinerliiffiusumi 19-inik, 27-nik, 28-nik 41-nillu ukioqartut, kingunitsianngua tigusarineqarput toqutsisimasutullu pasineqarlutik unnerluutigineqarput.
AAMMA ATUARUK Kalaallip Skagenimi toqutaanera pillugu suliami tigusaasoqaqqittoq
Toqutaasoq kalaallimik anaanaqartoq danskimillu ataataqartoq Danmarkimi peroriartorpoq. Saassussinerup kinguninngua toqutsineq inuit attaveqaqatigiittarfiini assigiinngitsuni hate crimetut taaneqarpoq - tassa kalaallinit kingoqqisuunini pissutigalugu toqutaasimasoq.
Taamaattoqanngilluinnartorli Jyllandip avannaata politiivinit kingorna erseqqissaatigineqarpoq.
AAMMA ATUARUK Skagenimi toqutsineq sumiuussutsimut tunngassuteqanngilaq
Politiilli unnerluussisussaatitaasuat naapertorlugu saassussineq akiniaalluni iliuuseqarneruvoq, toqutaasup unnerluutigineqartut ilaannut ilisimajunnaarsaammik ketaminimik tunniussisimanera pissutigalugu.
Ketamin ilaatigut uumasunut ilisimajunnaarsaatitut atorneqartarpoq, unnerluutigineqartullu ikiaroornartuusorigunakkaminik ketaminitornermi kingorna niuni nukillaartoorutigisimavai.
Angutit unnerluutigineqartut ilaat marluk pisuusutut nassuerput allallu marluk pisuunnginnerarlutik.
Unnerluutigineqartut pingasut ikinnerpaamik ukiuni sisamani parnaarussassanngortinneqarnissaat angutillu sisamaata piffissaligaanngitsumik pineqaatissinneqarnissaa unnerluussisussaatitaasut piumasaraat.
Eqqartuussineq Hjørringimi Eqqartuussivimmi ulluni arfineq-pingasuni ingerlanneqassaaq pilersaarutillu malillugit eqqartuussut januaarimi nalunaarutigineqassalluni.
