Angutip 22-nik ukiullip sapaatit-akunnerata naanerani marloriarluni pinerliiniarluni saassussisup sakkussaanik ikiuisimasutut angutit marluk politiinit unnerluutigineqarput, ekstrabladet.dk taama allaaserisaqarpoq.
Angutit pineqartut Københavnimi eqqartuussivimmi inatsit tunngaviusoq naapertorlugu ullaaq manna killisiorneqarput. Inatsit tunngaviusoq naapertorlugu killisiuineq Danmarkimi nalunaaqutaq malillugu arfineq-pingasut qaangilaaraa aallartittoq, eqqartuussivik nutaarsiassaqartitsivimmut Ritzaumut taama ilisimatitsivoq.
Angutit marluk angutip 22-nik ukiullip sakkussaanik ikiuinermikkut toqutsinermut peqataasimasutut unnerluutigineqarnissaat ilimagineqarpoq. Politiit Københavnimi sumiiffinni arlalinni uppernarsaatissanik ippassaq sapaammi ujaasereersullu angutit taakku tigusarineqarput.
Ilaatigut 22-nik ukiullip qatanngutaata angutip Københavnip illoqarfiata ilaani Østerbromi najugarisaani naqqup iluani ini politiinit misissuiffigineqarpoq.
AAMMA ATUARUK Politiit matuma silatinnguaniipput qulimiguullillu qulaavaarpalupput
Killiligaanani oqaaseqarsinnaaneq pillugu oqallitsitsinermut kingornalu Københavnip qiterpassuani Krystalgademi juutit naalaffiannut aallaasersorluni saassussisoqarnerata kingorna politiit sumiiffinni assigiinngitsuni misissuipput.
Saassussisoqarnerani angutit marluk toqutaapput politiillu tallimat ikiligaallutik.
Toqutsisoq angut 22-nik ukiulik, eqqartuussisup aalajangigaanik parnaarussaagallareerluni sapaatit-akunneri marlussuit matuma siorna iperagaavoq.
AAMMA ATUARUK Kalaallit Nunaanni Danmarkimisut qiteqqusimassaagut
