BIRNA pillugu suliaq Angutip kalaallip tigummigallarneqarnera sivitsorneqaqqippoq
Pasisap tigummigallarneqarnera pingajussaa sivitsorneqarpoq.
Angut kalaaleq Birna Brjánsdóttirimik 20-nik ukiulimmik Reykjavikimi toqutsisimasutut pasisaavoq.
Taanna januaarip ulluisa 18-anni Polar Nanumi, Polar Seafoodimit piginneqataaffigineqartumi, angut alla peqatigalugu Isalandip politiivinit tigusarineqarpoq. Kingorna tigusarineqartut ulluni 14-ini tigummigallagassanngortinneqarput.
Kilisammi inuttaasut Birna pillugu suliami pasisaasut aappaa iperagaanikuuvoq. Birnalli periarfeerunnera pillugu ilisimasaqarsorineqarnera pissutaalluni suli pasisaaqqalluni.
Pasisaasut aappaa, qaammat ataaseq parnaarussivimmeereersup, tigummigallarnera ullumi sisamanngornermi Reykjavikimi eqqartuussivimmi sivitsorneqaqqippoq.
Tigummigallarneqartup illersuisua KNR-imit attaveqarfiginikuuarput, taassumalli pasineqartoq pisuusutut pisuunngitsutulluunniit nassuersimanersoq oqaatigiumanngilaa.
