AAMMA ATUARUK Nuummi saassussinernut takunnissimasussarsiortoqartoq
Angut persuttaasimasutut tigusaavoq
Nuummi Radiofjeldip nalaani arnat marluk marlunngornerup unnuaani saassunneqarput.
Allattoq Kenneth Elkjær
marsip 02-at 2017 11:47
Angut 23-nik ukiulik politiinit tigusarineqarsimasoq, Politiini piareersimasut pisortaat Lina Davidsen KNR-imut ilisimatitsivoq.
Nunatsinni aqqusiinnarmi taama saassussisoqarnera nalinginnaanngitsorujussuummat pisoq politiit ulapputigigaat, piareersimasut ittuat, Mads Lynge Christensen ippassaq KNR-mut paasissutissiivoq.
Angut inatsit tunngaviusoq naapertorlugu sisamanngornermi killisiorneqassaaq, ullunilu 28-ni tigummigallarneqarnissaa politiit piumasariniarpaat.
Angut innuttaasumit saaffiginnittoqarnerata kingorna tigusarineqartoq, politiit paasissutissiipput.
Saassussinerit marluk piffissami sivikitsumi
Arnat marluk Nuummi Radiofjeldip eqqaani nalunaaqutaq 00.45 missaani saassunneqarput. Angutip arnaq siulleq saassuppaa taannalu angummit allamit ikiorneqarpoq.
Kingunitsianngua arnaq alla saassunneqarpoq taannalu toqqusassinneqarlunilu kiinamigut arlaleriarluni tillunneqarpoq.
Saassussinerit marluk suliaralugit ulapputigalugit, politiit pingasunngornermi paasissutissiipput.
- Taama nalaassisoqartarnera nalinginnaanngitsorujussuuvoq, taamaammat suliaq ulapputigaarut, piareersimasut ittuat oqarpoq. Taassuma Nunatsinni aqqusiniinnarmi taama nalaassisoqartarnera qaqugutigoornerarpaa.
