Angut kalaaleq qaartitsinissamik sioorasaarisoqarnerani marloriarluni qimagutsinneqartoq

Qaartartumeerinissamik sioorasaarutit allakkatigut qarasaasiamiit nassiunneqartarsimapput. Maannamut pisiniarfissuit tallimat, mittarfeqarfiit pingasut taakkununnga ilaallutik Københavnip mittarfeqarfia, Københavnip Universitetia aamma ilinniarfik Copenhagen Business School sioorasaarneqarsimapput.

Sioorasaarutit siulliit Roskildip Aarhusillu mittarfeqarfiinut pisiniarfissuarnullu marlunnut Sjællandimiittumut nassiunneqarput. Piffiinnit sisamaniit taakkunaniit inuit qimarngussortinneqarput, qimmillu qaartartunik ujaasitinneqarlutik.

Politiilli ualeq manna nalunaaruteqarput qaartartunik nassaartoqarsimanngitsoq.

Timmisartumi aquttunngorniaq kalaaleq Roskildemi ilinniartoq pisoq qanoq misigisimaneraa paasiniarlugu KNR-imit oqaloqatigaarput. 

Jens Møllerip atuarnerata nalaani qaartitsinissamik sioorasaarineq pisimavoq. 

- Timmisartunik inissiisarfik igalaamiit takusinnaagakku biilerpassuit timmisartunik inissiisarfimmukakaasut takuakka, Jens Møller KNR-imut oqaluttuarpoq. 

- Arlaannik pisoqarsimassasoq eqqarsarpunga. 

Sivitsunngitsoq Jens Mølleri taassumallu atuarfianiittut tamarmik qimanngussorneqarput. 

Kinguninngua Jens Mølleri atuaqatini ilagalugit pisiniarfissuarnut Ro's Torvimukarput. Paasinarsivorlu aamma tassani pinartoqartoq. 

- Pisiniarfik ataaseq alakkarlugu angumeraarput. Niuertarfissuarmilu qaartitsinissamik aamma sioorasaarisoqarsimammat aneqquneqarpugut, Jens Møller oqaluttuarpoq. 

- Eqqissiivilluta niuertarfissuaq qimapparput, soorlu aamma inuit allat taamaaliaortut, Jens oqaluttuarpoq. 

Qimarngussuinerit eqqissisimasumik pisimapput politeerpassuit takussaaneri eqqaassanngikkaanni tupaallannartoqarsimanatik. 

- Massakkut ajunngeqaanga, ajunngilagut. Mittarfimmiissinnaanngoqqereerpugut, Jens oqarpoq. 

Qaartitsiniaq tigusaasoq

TV Øst ilisimatitsivoq angut tarnimigut nappaatilik qaartitsiniarluni sioorasaarisuusimasoq tigusarineqarsimasoq.