Angut kalaaleq pinngitsaaliisimasutut toqutseriaraluarsimasutullu pisuutinneqartoq
Angut 30-nik ukiulik arnamik siorna aggustip qaammataani ullaaralaakkut arparujoortumik saassussisimasutut pisuutinneqarluni eqqartuunneqarpoq.
Arnaq pineqartoq orpikkat akornanni atisaajarneqarsimalluni inuunerminillu navianartorsiortoq nassaarineqarpoq.
Københavnip illoqarfiata ilaani Østerbromi Sporsløjfenip eqqaani saassunneqarnermi pinngitsaalineqarnermilu kingorna nalunaaquttap akunnerini qulingiluani tassani nalavoq.
Angutip pinngitsaaliinermini arnamik toqutseriaraluarsimasutut unnerluutigineqarpoq. Arnaq tilluarlugu, isimmittarlugu allunaasamillu qiminniarsaralugu toqunniarsimagaluarpaa. Tamatuma kingorna arnaq aanaartoq ilisimajunnaaqqasorlu qimaannarsimavaa.
Dna atorlugu uppernarsaatit nakkutilliissutitigullu immiussat atorlugit paasineqarpoq pinerluttoq tassaasoq angut kalaaleq 30-nik ukiulik.
Angutip unnerluutigineqarnini ilumuunnginnerarpaa.
Aamma atuaruk Pinngitsaaliisimasutut unnerluutigineqartoq: Uanga taamaattuunngilanga
Unnerluussisussaatitaasut naapertorlugit, angut pineqartoq ima ulorianaateqartigaaq immikkut paarisassanngorlugu pineqaatissinneqartariaqarluni. Tamannalu isumaqarpoq killiligaanngitsumik parnaarussassanngortinneqassasoq.
Angutip inaarutaasumik pineqaatissinneqarnissaa marlunngornermi pissasoq naatsorsuutigineqarpoq.
Politiinit paarigallagassanngortinneqarnermi nalaani eqqartuussisunut politiinullu arlalinnik allagaqarsimavoq. Allakkallu ilaat eqqartuussivimmi saqqummiunneqarput, ilaatigut ima imaqartut:
- Uanga taamaattuunngilanga. Pinerluttuliortup nakuuserfigeriaraluarpaanga. Akiuunniarsarigaluarpunga, pinerluttup ajappaanga qimaallunilu.
- Naggataagut qasusupilussuullunga pinerluffigineqartoq qallerlugu uppiffigaara nuakoorfigalugulu. Naggataatigullu uanga pisuutinneqarpunga, allakkamini taama allappoq.
Unnerluutigineqartoq nunatsinneersuuvoq tartumigullu nappaateqarnini pissutigalugu Kalaallit Peqqissartut Angerlarsimaffianni Københavnimiittumi maanna najugaqarluni.
Tartumigut nappaateqarnini aliasuutigileraangamiuk ilaanni imigassartortarluni oqaatigaa.
Unnerluutigineqartoq naapertorlugu, saassussisoqarnissaanut aqaguttoq immiaararsillunilu vodkasisimavoq. Taakku imersimavai peqatigisaanillu aamma iisartakkanik nappaamminut nakorsaatinik iioraasimalluni.
Eqqaamasaa kingulleq tassaavoq oqarasuaatikkut oqaloqateqarluni, kinali oqaloqatigisimanerlugu oqaatigiumanngilaa.
/ritzau/