Angut inuusuttoq Narsami 14-inik toqutseriarsimasutut unnerluutigineqartoq

Angut 21-nik ukiulik Narsami siorna marsip 22-ani aallaammik arlaleriarluni seqqorpoq.

Angut 14-inik toqutseriarsimasutut maanna unnerluutigineqartoq, Kalaallit Nunaanni Politiit tusagassiuutinut nalunaarummi paasissutissiipput.

Angutip illoqarfimmi eqqarnermi saniatigut qulimiguullip mittup tungaanut aamma eqqarpoq.

Inuit marluk aallaammit eqqorneqarput, inuillu pingasut aallaammit eqqorneqartunit ajoquserneqarlutik.

Angut politiinit ulloq taanna tigummigallarneqalerpoq, tamatumalu kingornali politiinit nakkutigineqarsimasoq politiit allapput. Angut marsip 18-ianit 22-anut eqqartuussivimmi unnerluutigineqassaaq, suliamilu pissutsit immikkut ittut pissutigalugit suliaq Aarhusip eqqartuussiviani ingerlanneqassalluni.

Allanik aamma unnerluutigineqartoq

Inuit marluk aallaammit eqqorneqartut inuunerminnik navianartorsiunngitsut, inuillu pingasut ajoqusertut aqerlup tunnerinit aserorneqartunit ajoquserneqarsimasut, Kalaallit Nunaanni Politiit aallaasersortoqarnerani unnukkut nalunaarutigaat.

- Aqerlup eqqugaanit ajoquserput, aqerlumit eqqorneqartut taakku aserornerannit eqqorneqarput, pigaartut pisortaat, Brian Thomsen KNR-imut siorna marsip 22-ani unnukkut oqarpoq.

Angut 14-inut toqutseriartutut unnerluutigineqarnermi saniatigut ikuallatsitsisimasutut, nakuusertutut inuunermillu siorasaarisimasutut aamma unnerluutigineqarpoq.

Annanniarnissamik eqqarsaateqartoq

Pisumi isiginnittup qumiguulik qaalersoreqqaarsimagaluarlugu aatsaallu susoqarnera paasigamikku uivertoqalersimasoq pisup kingorna KNR-imut oqaatigaa.

- Taava eqqarsarlunga ilaalaa tassa helikopter qaalerpoq. Nilliallunga uanga aallartikkama: ’aniniarta helikopteri qaalerpoq’, qitequtera peerniarsariutigalugu, Ivalo Motzfeldt qulimiguulimmi issimavoq oqarpoq.

Ivalo Motzfeldtip ilaaqatinilu inuuniarsimanertik KNR-imut oqaluttuaraa:

- Ambulancenik ingerlatsisup heliportip illutaata tunuani toqqorsimalluni suaartarluni aggeqquvaanga. Taava taamaaleruttortoq aallertussara, kammaga biilinik qummut aallarami. Taava tassanngaannaq aalajangerama; naajj uanga biilinukalerpunga arpaannaq arpaannaq biilinut. Taava ilaaqatigut pingasut aamma nunaannakkut nueriasaaramik, pingasuulluta tassa biilinut ah sisamaalluta, biilinut teqqaatiusaannaq ikigatta matulluanngilarpulluunniit; illoqarfiliaanniartigut aallaasersortoqarpoq, Ivalo Motzfeldt oqarpoq, nangillunilu:

- Tassa uanga qimaasorujussuanngorama annanniaavissortariaqarpalullunga. Aatsaat unnukkut eqqarsaatigilerpara sanngiinnerusortagulluunniit ikiornissaanik eqqarsaateqaavissimanngilanga, kisiat tassa annannissaq, taanna siorna oqarpoq.

Lastbilinut qimaasoq

Ilinniartitsisoq, Sara Olsen Nielsen ilisimannittut iligaat, taanna uiminik qulimiguulimmut ilaasumik aallerluni qulimiguullip qanittuaniippoq.

- Uiga attavigisinnaanngilara, allatullu iliuusissaqarnanga. Inuilli qulimiguulimmit qimaasut ilaat uppippoq. Taannalu uigigiga kingulliullunilu qimaalluni orlusoq paasinarsivoq.

Sara Olsen Nielsenip ungasinnini pissutigalugu uini takusinnaanngilaa, oqarasuaatikkulli attaviginiaannarlugu:

- Sianerfigeqattaarpara akinerli ajorluni. Namminerli sianerpoq. Lastbilip tunuanut nallarsimalluni oqaatigaa. Tamatumalu kingorna illoqarfiliaanneqarluni, taanna KNR-imut oqarpoq.

Politiit ilisimannittut marluk siorna pisoqarneranik nassuiaanerat uppernarsanngilaat. Taamaammat susoqarfiarsimanera Aarhusimi eqqartuussineq marsimi aallartippat tamanna paasisaqarfigilluassavarput.