Angut eqqartuunneqartoq sunnertisimasoq
Angutip pinngitsaaliilluni atoqateqarsimasutut toqutseriarsimasutullu eqqartuunneqarnera ullumi pingasunngornermi aallartippoq. Angut killigaanngitsumik pineqaatissinneqassasoq unnerluussisussaatitaasut piumasaraat, angullu unnerluunneqarnerminik ajuusaaruteqartoq qularnanngitsoq, BT-imi tusagassiortoq KNR-ip oqaloqatigisaa oqarpoq.
- Qularnanngitsumik angutip piffini qanoq innera nalorpasinngilaa. Assut nipaalluni oqaluppoq. Nassuiaateqaraangami nipikitsumik oqaluttarpoq, suliallu ilungersunassusaa sunnerteqqassutigigaa malugineqarsinnaalluarpoq, BT-mi tusagassiortoq Birger Andersen KNR-imut oqarpoq.
Unnerluunneqartup pinngitsuunerarnini attattuarpaa, unnuami tassani qulinik immiaarartornikuullunilu kimittuumik vodkatornikuugami pisut eqqaamasaqarfiginnginnerarpai. Tigummigallarneqarnerminili qanoq pisoqarsimaneranik eqqaamasaqalersimanerarpoq.
- Angummit arlaannit saassunneqarunarluni eqqaamalaarnerarpaa. Arnarlu pinerluffigineqartoq uppiffigisimasinnaallugu nassuiaatigaa. Arnami angummi DNA-nik nassaartoqarneranik tamanna pissutaasinnaasutut oqariartuuteqarpoq. BT-imi ilanngutassiortoq, Birger Andersen oqarpoq.
Eqqartuussinerup ingerlanerani uppernarsaataasinnaalluartut saqqummiunneqarput, tassa DNA-nik misissuinerit sumiiffinnit uppiffiginninnerinnakkut pisinnaanngitsunik nassaartoqarsimavoq.
- DNA-nillu taama nassaarneq tutsuiginarnerpaavoq, Birger Andersen oqarpoq.
Pingasunngornermi eqqartuussineq eqqartuussinissanit pingasunit siulliuvoq. Pilersaarut malillugu maajip ulluisa 23-anni eqqartuussut inaarneqassaaq.
AAMMA ATUARUK Uanga taamaattuunngilanga