"Angerlarsimaffeqarani ilungersunarpoq assoroornarlunilu"
Nunarput tamakkerlugu inuit 878-it angerlarsimaffeqanngitsutut nalunaarsorneqartut kisitsit kingulliit saqqummiunneqartut takutippaat.
Taakkununnga ilaavoq 31-nik ukiulik Nuka Amiinnaq, taanna Nuummi maanna najugaqartoq.
- Ilungersunarpoq assoruunnarpoq, puiaasaaqqat puukuinik unnuaq naallugu katersisinnaasarpunga, nerisassaqarniarlunga, eqqaaavissiortarpunga, oqquiffissarsiortarpunga aamma ullut ilaanni nerinnngitsuungajattarpunga, Nuka Amiinnaq oqarpoq, - qanorluunniit silarlutigigaluartoq silamiittariaqartarpunga, Nuka oqarpoq.
Nuka Amiinnaq Frelsens Hærip illuutaannik angerlarsimaffeqanngitsut ornittagaanik atuisuuvoq, tassani nerisinnaallutik. Maanna nalunngisamini najugaqarallarpoq.
Kommuneqarfik Sermersuumi, Kalaallit Nunaanni kommunit inuttunersaanni angerlarsimaffeqanngitsut 469-iupput.
Levi Martinsen maanna 60-inik ukioqartoq ukiut 20-t sinnerlugit angerlarsimaffeqanngilaq.
AAMMA ATUARUK Angerlarsimaffeqanngitsunut iliuusissat ujartorneqarput
Angerlarsimaffeqanngitsut Kalaallit Nunaanni illoqarfiit anginersaanni amerliartornerat Levi Martinsenip malugisinnaavaa.
- Amerliartorput, ikiliartornaviarunanngillat, amerliartornissaat ilimanarpoq, Levi Martinsen "Naalanngi" taama oqarpoq.
Inuuniarnikkut ajornartorsiuteqartut ingerlariaqqinnissaannut sammisassaqartitsiviat Kofoed Skole, angerlarsimaffeqanngitsut suliffeqanngitsullu atorluartarpaat.
Kofoed Skole ataasinngornermit tallimanngornerup tungaanut ammasarpoq.
Kofoed Skolemi sanaluttoqartarfeqarpoq, assassortarfeqarluni atuartitsisoqartarluni aamma isumaginninnermut siunnersortinik oqaloqateqartoqarsinnaalluni. Kofoed Skolemi atuisunut 40-nut inissaqarpoq.
Kofoed Skolemi ulluinnarni ingerlaneqarnerani aqutsisup Gujo Thorsteinssonip Nuummi angerlarsimaffeqanngitsut amerliartornerat uppernarsarpaa.
- Nunarsuarmi tamarmi taamaappoq, sumiiffigissami suliffissaqanngippat illoqarfinnut anginerusunut imaluunniit illoqarfissuarnut nuuttarput suliffissarsiorlutik, maani aamma taamaappoq, Gujo Thorsteinsson oqarpoq.
AAMMA ATUARUK Nuummi angerlarsimaffeqanngitsunut unnuisarfeqalissasoq
Kommuneqarfik Sermersuup Nuummi angerlarsimaffeqanngitsunut unnuisarfii marluk 72-inut inissaqarput.
Angerlarsimaffeqanngitsut najugaqarfissaannik 26-nik containerinik Kommuneqarfik Sermersooq maanna sanatitsivoq.
Angerlarsimaffeqanngitsut suliffillit taakkunani najugaqarsinnaallutik. Najugaqarfinni containerini imigassamik ikiaroornartunillu atuisoqaqqussaanngilat.
