Angerlarsimaffeqanngitsunik ikiuisut
Mikael Kúnak Kristiansenip Qanoruup ilanngutassiaa aamma takusimavaa.
- KNR.gl-ip quppernerani saqqummerniariartoq atuapallakkakku filmklipperlu takullugu, misigileriataarlunga taamatut oqorsaatigisinnaasaanik katersipallattariaqarlunga, Mikael Kúnak Kristiansen KNR-imut oqarpoq.
Taassuma ilanngutassiaq takugamiuk ingerlaannaq qisuariarpoq, angerlarsimaffeqanngitsulu oaorsaatissaanik katersilluni aallartilluni.
Aamma atuaruk: 73-inik ukiulik tupermi qiulerluni najugaqartoq
Gangini sinittariaqartarsimasoq
Mikael Kúnak Kristianseni pissutissaqarluarluni angerlarsimaffeqanngitsup pineqartup inissisimanera paasilluarsinnaavaa.
- Nammineerlunga 2007-imi misiginikuuara angerlarfissaqarnanga maani Nuummi, opgangini sittarnikuullunga. Taanna paasisinnaagakku qanoq aqqusaagaqarnersoq qanorlu misigisaqarnersoq ukiup nillerteruttornerata nalaani, Mikael Kúnak Kristiansen oqarpoq.
Inuit ikiuukkumasut
Taanna ilisarisimasani peqatigalugu Facebookimi quppernermik sanasimavoq Nuummi angerlasimaffeqanngitsut ikiorneqarnisai siunertaralugu. Inuppassuit ikiuukkusunnertik takutissimagaat, oqorsaataasinnaasunillu assigiinngitsunik tunniussiumasoqartoq, Mikael Kúnak Kristiansen oqaluttuarpoq.
Taassuma aamma oqaatigaa Utoqqaq angerlarsimaffeqanngitsoq ullumi oqorsaatinik pajunneqassasoq, atisarpassuillu sinneri angerlarsimaffeqanngitsunut allanut tunniunneqassasut.
Mikael Kúnak Kristiansen, angerlarsimaffeqanngitsuusimasoq ullumikkut Ilinniarfissuarmi ilinniartoq, politikkerinut qineqqusaartunut oqariartuuteqarpoq.
- Kalaallit Nunatsinni silami ukiukkut tupermi sinittariaqarneq tulluutinngilluinnartoq nalunngilara. Soorunami paasisinnaavara politikkerit suliassaqartut, kisianni takusinnaasariaqarpaat Nunatsinni appasinnerpaatut pissakinnerpaatullu inissisimasut qiviarneqarsinnaanissaat, Mikael Kúnak Kristiansen KNR-imut oqarpoq.