Angerlarsimaffeqanngitsoq ikiorneqartoq

Angut angerlarsimaffeqanngitsoq Kommuneqarfik Sermersuup Nuummi paassaasiviani ullut 17-it mattussaaqqasoq marlunngormat nassaarineqarpoq. Angerlarsimaffeqanngitsoq taamaakkaluartoq ajunngilaq, kommunillu pisariaqartutigut ikiorpaa.

Angut misissorneqarpoq

- Innuttaasoq ineqatigiiffiutitta ilaanni inissarsigallarparput. Sana-mit ippassaq misissorneqarpoq ullumilu ajunngilaq, Kommuneqarfik Sermersuumi isumaginninnermut, suliffeqarnermut inuussutissarsiuteqarnermullu pisortaq Grethe Nielsen oqarpoq, nangillunilu:

- Nammineq nikuippoq sulisuttalu Sana-mut misissortikkiartorpaat. Allanik paasissutissiinerusinnaanngilanga.

Angut angerlarsimaffeqanngitsoq Nuukullammi paassaasivimmi aappassaanik mattussaavoq. Aperujussuarneranik siullermeerluni ullut arlallit januaarip qaammataani mattussaaqqavoq, angerlarsimaffeqanngitsullu toqqorsivimmut iseqqinnginniassammata, toqqorsivik kommunimit assiaqutserneqarpoq.

Angut matumani komminimit ullut 17-it mattussaavoq. 

Kommuni qulaajaalerpoq

Kommunilu nammineq arajutsisoq, sanaartornermut avatangiisinullu ingerlatsivimmi pisortaq Mike Jakob Kristiansen oqarpoq:

Parnaannginnerani inoqarnersoq misissorneqaqqaarpa?
- Aap.
Iluamik misissorpisiuk?
- Taamatut paasitinneqarpugut. Naluarpulli takanani arlaanni toqqorfissaqarnersoq, Mike Jakob Kristiansen oqarpoq.

Kommunilu suleriaatsiminik qulaajaaleruttorpoq. 

- Tamanna ajuusaarnaqisoq qularutissaanngilaq. Kommunip suliffeqarfittut iluani qanoq kukkusimanerluta paasiniarparput, pisortaq Mike Jakob Kristiansen oqarpoq.