Angallatip arfeq aporaa
Angallat Ilulissaniit Saqqamut ingerlaartilluni sapaatip-akunnerani kingullermi qipoqqarmut aporpoq. Angallammiipput Hans Eriksen taassumalu sakia. Taakkua ajutoorneq pimmat Saqqami illuaqqami aasarsiortarfimminnut atortussanik siuussipput.
- Arfeq 3-4 meterinik ungasitsigisoq takuarput, kingusinaareerlutali, Hans Eriksen oqaluttuarpoq.
Taanna apornermi avammut erfagiussaavoq tunnerminilu ilisimajunnaarluni.
- Naluara qanoq sivisutigisumik ilisimasimannginnerlunga, ilisimmarpungali immap iluaniillunga, Hans Eriksen oqaluttuarpoq.
Taanna immap qaanut nalukkasuarpoq angallammullu tassuuguinnaq qaqisinnaasimalluni.
- Suut tamarmik sekuntialunnguit ingerlanerinnaanni pisimagunarput, qaangiutereermatali aatsaat eqqarsarsinnaanngorpunga, Hans Eriksen oqaluttuarpoq.
Taassuma aporujussuarnerminni isarussani, mobilini kaasarfimmiunilu tamaasa annaavai.
Angutit taakkua marluk Saqqamut ingerlaqqipput, nunaqarfimmilu unnuissallutik aalajangerlutik.
- Ilulissani ilaquttakka aqaguani takoqqikkakkit aatsaat annilaangalerpunga, Hans Eriksen oqaluttuarpoq.
Taanna massakkut assamminik anniarpoq ajutoornerli aamma qaangersimallugu. Sakia aamma kimillatsitersimasoq taamaappoq.
- Arfeq takoqqinngilarput, aammami taanna saneqqamigut annertuumik ikilertissimassaaq, Hans Eriksen oqaluttuarpoq.
Arferit umiatsiallu aportarneri qanoq amerlatiginersut Pinngortitaleriffimmi ilisimaneqanngilaq, ilisimatusartulli Lars Wittingip siornatigut pisarsimasut taamaattut tusarsimavai. Taassuma arferup ajoqusersimanissaa nalilersinnaanngilaa.
-Tamatumani umiatsiap angissusia qanorlu sukkatiginera apeqqutaapput. Umiatsiarli sukkasuumik ingerlasimappat taava arfeq immaqa qannguallattumik misigisaqarsimassaaq.
Aammattaaq arferit umiarsuarnit assartuutinit anginerusunit aporneqaraangamik toqutaasarput.