Angallat juullisiorianik 21-nik ilaasulik ikuallaleraluartoq
Ilaasut ilaat, Julia Jensen ima oqaluttuarpoq.
- Malissiornitsinni umiatsiaq assut orfaavoq, tamannalu pissutigalugu umiatsiap kissarsuutaa nissuma tungaanut uppippoq ikummaserlunilu. Qujanartumik illuapallanninni ajutumiinngilanga, Julia Jensen oqaluttuarpoq.
Angallammi ilaasut 21-it marlunngormalli nunaqarfimminnut Ilulissaniit aallartussagaaluarput. Air Greenlandilli qulimiguuliutaata nammineerluni aquutigisartagaata ajoquteqalersimanera pissutigalugu, aallarnissaat kinguartinneqaqattaarpoq, tassalu aatsaat ippassaq tallimanngornermi ualikkut aallaraluarput angallamik, Air Greenlandimit attartorneqarsimasumik.
Ippassaq silarluppoq mallerlunilu, Julia Jensen oqaluttuarpoq imalu nangilluni.
- Umiatsiap kissarsuutaa petruliutortoq uppilluni ikuallalermat, tamatta silaarutaasalluta nillialerpugut. Kissarsuutip uppinneratigut ilaasut ilaata qarlii ikuallalerput, taannalu aquttutta ikiorniarlugu aquutini qimaannarlugu qatseriniarsarilerpoq. Tassalu aquttoqarata minutsip ataatsip missaani sukkaqaluta ingerlalluta.
Julia Jensen aamma oqaluttuarpoq, angallatip aquttuata kissarsuut ikuallattoq anninniarlugu matukkut anisinnaasimanngitsoq, tassami ilaasut ussallutik matukkut mikisuaqqakkut ataatsikkut aniniarsarilersimammata.
- Tamatta avaalaartaannaq aniniarsarivugut. Sunaaffa aamma ilaasut ilaata meerannguani mikisoq qimaannarlugu aamma matukkut aniniarsarigaluartoq, aatsaalli qaatulerluni meerannguani ikiorpaa. Tassa tamakku annilaarnartut misigisatta ilaagaat, Julia Jensen taama oqaluttuarpoq.
Air Greenlandip pisortaanera, Christian Keldsen KNR-imut oqarpoq, ajuusaarutigalugu Ilulissaniit nunaqarfinnut ilaasut ippassaq taama misigisaqartinneqarsimammata. Pisortaanerullu aamma oqaatigaa, angallatit Air Greenlandimit attartorneqartartut tamarmik misissorneqartarmata angallassinissamut akuersissuteqarnersut, aamma Ilulissaniit nunaqarfinnut ippassaq angallat attartorneqartoq misissoqqaarsimasoq oqaatigalugu.
Nunaqarfinnut juullisioriat ikuallattoqarneranik misigisimasaat pillugu taakku tarnip nakorsaanik oqaloqatiginninnissaat, Air Greenlandimit neqeroorutaasimasoq, Christian Keldsenip oqaatigaa. Taamaattorli ilaasut arlaannaalluunniit suli tamassumunnga akuersisimanngitsut aamma oqaatigalugu.
Angallammi ikuallanneq politiinit maanna misissorneqaleruttortoq, Ilulissani politeqarfimmi pigaartup, politiip Mads Lyngep oqaatigaa, misissuinerlu ataasinngorpat nanginneqassasoq KNR-imut oqaatigalugu.
