Angalatitseqatigiiffiit: Staycation ima misigaarput
- Avataaninngaanniit tikittut ikinnerupput siornatigornit naleqqiullugu taamaattumik nunatsinninngaanneertunik nutaanik taarserneqarput, Erna Møller, Arctic Umiaq Linemi teamleaderi oqarpoq.
Nunatsinni coronamik tunillatsissimasut 13-iupput. Tamaattumik marsip 18-anit juunip 15-iata tungaanut nunatsinnut angalanneq matuvoq. Juunip 15-ianit nunatsinnut tikittut sapaatip-akunneranut amerlanerpaamik 600-sinnaapput.
AAMMA ATUARUK Ulloq kiisami aalajangerneqarpoq: Nunarput juunip 15-iani ammaqqissaaq
Nunagisaq qimannagu sulinngiffeqarlutik angalarusuttut amerlisimasut Erna Møllerip suleqatinilu malugaat.
Nunatsinnili angalasut qanoq amerleriartigisimanersut, Arctic Umiaq Linep kisitsisaatiginagu oqaatigaa.
Nunatta isertugaatai
- Tusagaqarnikuuvugut: "Nå, uagut ukioq manna nunatsinni angalassaagut. Sarfaq Ittummut ilaalluta sineriak misigissavarput." Nunatta isertugaatai sorpassuusinnaapput avatangiiseq, umiarsuami misigisasaat, erinarsortut soorlu assigiinngitsut, Erna Møller oqarpoq.
Nunagisami angalanissamut kiisami aamma utoqqatsissutissaqartoqalersoq, angalatitseqatigiiffik Travel By Heart isumaqarpoq.
- Aallaqqaammut Kangerlussuaq nuannerunartinneqarnerpaavoq. Elise Bruun, Travel by Heartimik piginnittoq oqarpoq.
Nunatsinni inuit Danmarkimut nunanullu allanut angalasinnaajunnaarnermik kingorna nunaminni angalarusunnerulersut taassuma oqaatigaa.
AAMMA ATUARUK Sarfaq Ittuk maajip aallaqqaataani angalaqqilissasoq
- Aasariartorneranilu malittarisassat allanngortinneqarpallaanngeriarmata ilaqutariit nunatta iluani angalaniartut attavigisarpaannga, nunatta kujataa assut soqutigineqarpoq,
Elise Bruun oqarpoq.
Ukioq mannalu staycationertut amerlammata angalatitseqatigiiffik
aappaagumut pilersaaruteqarpoq.
- Eqqarsaatersuutigivara ukiup tulliani staycationimik neqerooruteqaqqissallunga. Inuimmi nunarput qanoq nuannertigisoq soorlu aatsaat paasiartuaaleraat.
