Angalaqatigiittartut amerlilerput

Taamaammat Angalaqatigiit tarnip pissusaanik ilisimasallit maanna arfiniliusut arfineq pingasunut amerlineqarnissaat pilersaarutaasoq, Isumaginninnermut Naalakkersuisoq, Martha Lund Olsen (S) oqarpoq.

- Nuannaarutigivara taama pikkoritsigisunik psykologinik arfinilinnik iluatsitsilluta suleqateqalersimagatta. Misilittagaqarluartut aamma pikkorissut. Aamma ukioq manna, ungasinngitsumi ilaqqittussaavagut, tassa arfineq pingasunngorlutik. Illoqarfinni assigiinngitsuni sulisussanngussapput.

Martha Lund Olsen taama oqarpoq.

Aamma atuaruk Angalaqatigiittartut sulinerat iluatsilluartoq

Kinguaassiutitigut atornerlunneqarsimasut katsorsarnissaanut ukiumut 12 milliuunit koruunit atorneqartarput, taakkunanngalu 7,6 milliuunit koruunit Angalaqatigiinnut atorneqartarlutik.

Taamaakkaluartoq kinguaassiutitigut atornerlunneqarsimasut illoqarfinni katsorsartinnissaminnut periarfissaqarpianngitsut oqaatigineqarluni.

Illoqarfinnili periarfissat pitsanngorsarneqartut,  Martha Lund Olsen oqarpoq.

- Ukiuni makkunani ilaqutariinni sullissivinni nukittorsaavugut. Taamaattumik illoqarfiit tamangajammik ilaqutariinnik sullissivinnik peqalernikuummata taakkua qanimut suleqatigisarpagut, isumaginninnermiluunniit allaffeqarfiit suleqatigalugit, illoqarfiit ilaanni aamma napparsimaveqarfiit qanimut suleqatigalugit.

Isumaginninnermut Naalakkersuisoq, Martha Lund Olsen oqarpoq.

Nuuk, Tunu sinerissamilu nunaqarfiit tarnip pissusaanik ilisimasalinnit suli angalavigineqanngillat.