Angajoqqaajulluarneq pillugu filmiliaq nutaaq
Angajoqqaajulluarneq pillugu filmiliaq "Ikioqatigiitta?Skal vi hjælpes ad?" maanna filmiliarineqartussanngorpoq, peqatigiiffik Foreningen Grønlandske Børn, ilinniarsimallutik sulisut Qaqortumeersut peqatigalugit suliarineqarsimalluni.
Ilaqutariinnut sullissiviit inunnillu isumaginnittoqarfiit filmi sulinerminnut atatillugu atorsinnaassavaat, angajoqqaanik meeqqerivinni atuarfinnilu ataatsimiitsitsinernut atorneqarsinnaassalluni.
- Angajoqqaat ilinniarsimallutillu sulisut akornanni qanoq ilinikkut oqaloqatigiilluartoqarsinnaanersoq filmip takutinniarsarissavaa, Foreningen Grønlandske Børnimi ataqatigiissaarisoq Gunver Justesen, oqarpoq.
Qaqortumi ilaqutariinnut sullissiviup filmi isumalluarfigaat:
- Filmi isumalluarfigaarput, kalaallisut oqaasertalimmik sakkoqalerpugut, angajoqqaat qajannarsinnaasut sullinneqarneranni atorluarsinnaassallutigu, Qaqortumi Ilaqutariinnut sullissivimmi pisortaq Cecilie Jeremiassen oqarpoq.
- Angajoqqaanik angajoqqaajunermi suliniapiloortunik sulinitsinni ulluinnarni naapitsisarpugut, neriuppugullu filmiliap nutaap qanoq iliornikkut angajoqqaajulluarneq anguneqarsinnaassanersoq takutissinnaassagaa, Cecilie Jeremiassen oqarpoq.
Filmi "Ikioqatigiitta?Skal vi hjælpes ad?", ilinniarsimallutik sulisunut Katuami workshopertitsisoqarnerani ullumi ullaap tungaani takutinneqassaaq.