Ane Hansenip Inatsisartuniiginnarallarnissaa siulittaasuata aporfissaqartinngilaa
Ane Hansen kommunalbestyrelsemut qinersisoqarnerata kingorna Qaasuitsoq kujallermi ikaarsaariarnermut ataatsimiitsitaliami siulittaasunngorpoq, borgmesterinngortussanngorlunilu. Taamaattorli Inatsisartut allaffeqarfiini suli takussaavoq, sulimi tamaani ilaasortaavoq.
Siulittaasumili piumasaqaataa malinnerarpaa.
- Malinneqarpoq. Tassa una erseqqissaassutigissavara ukiup naanissaanut Qaasuitsup borgmesteria borgmesteriummat. Taavalu aatsaat januarip aallaqqaataani 2018-iminngaanniit kommunalbestyrelse nutaaq kommunillu taakku marlunngortussat aatsaat atuutsilertussaammata, Ane Hansen nassuiaavoq.
Ane Hansen ikaarsaariarnermi ataatsimiitsitaliap siulittaasuatut, kommunep nutaap pilersinnissanut eqqissisimaarnissaminut tunngavissaqarpallaanngilaq.
-Tassa suliassagut suunersut paasilluaqqissaarnikuuagut. Aamma taamaammat taanna pissutigalugu pilersaarusiagut annertuut ingerlatereernikuullutigit. Tassa ukiup naanissaanut ikaarsaariarnermut ataatsimiitsitaliaasussaavunga, tassa illuatungeriiulluta, Ane hansen KNR-mut oqarpoq.
Ane Hansenip ikaarsaariarnermut ataatsimiitsitaliami siulittaasuujutigaluni Inatsisartuni sulinera, Inuit Ataqatigiit siulittaasuata Sara Olsvigip piumasaqaatiminut eqquutsitsinnginnertut isiginngilaa.
-Suli borgmesterinngunngilaq. Qaasuitsup kommunia borgmestereqarpoq. Borgmesteriusussaasumik aamma ukioq naallugu. Taavalu aamma isumaqarpunga pingaaruteqartoq oqaatigissallugu ikaarsaariarnissamut ataatsimiititaliarsuaq suliluunniit ivertitinngillat, inissisitinngillat. Tamannalu pereerpat paasilluarsinnaavara aatsaat Ane Hansen qinigaaffiup aappaaniit tunuarnissani suliarilissagaa, Sara Olsvig oqarpoq.
