Ane Hansen: New Yorkimi inuit sunnertissimarrapput
Aningaasaatilissuaq Donald Trump USA-mi naluneqanngitsutut præsidentissatut 45-rissaattut ippassaq qinerneqarpoq, Barack Obama tulleralugu præsidentip illorsuanut januarillu qaammataani isertertussanngorpoq.
Qinerneqartullu Donald Trumpip illersuisuisa New Yorkimi nuannanneranni, illoqarfiup ilaani allami, allatorluinnaq misigisimasoqarpoq.
- Inuit sunnertisimaarrattorujussuupput, assut najummatsisimanarlutik ippassaq unnukkut ingammik. Time Squaremikkaatta, taakani inupparujussuaqarami. Ilai nilliarrallutik sakkortuunik, akerartuullutik imminnnut. Taamaammat najummatsisimanarami assut. Tupinnanngitsumillu politeerpassuaqarpoq ippassaq. Sillimaniarneq annertungaatsiarpoq ippassaq takuarput, Nunanut allanut sillimaniarnermullu ataatsimiititaliami siulittaasoq, Inuit Ataqatigiinneersoq, Ane Hansen, maanna New Yorkimiittoq oqarpoq.
Hillary New Yorkimi ajugaavoq
Trumpip unammilertaa, Hillary Clinton, uissuumminanngitsumik naalagaaffimmi New Yorkimi qinerneqarnerpaavoq, tassami New Yorkimi qinersisinnaasut 80 procentiisa sinnerlugit Clinton qinerpaat, illersuisuisalu pakatsinertik toqqortinngilaat.
- Rockefeller Centerimi aamma katerisimaartoqarpoq Hillary Clintonimik illersuisunik. Takanani aamma nanertisimaartorujussuupput inuit. Inuusuttuararpaassuit aamma inuusuttut attortisimaartut malunnarpoq. Ilai qissallutillu pigamik, Ane Hansen KNR-imut oqarpoq.
Illoqarfik sininngisaannartoq innarpoq
Illoqarfillu sininngisaannartoq præsidentimut qinersinermi ajorsarnermigut quarsaartinneqarujussuarpoq.
- Illoqarfiup qeqqa katerisimaarfiusoq qimakkatsigu tupinnartupilussuarmik inoqanngiusappoq, taamaallaat inuit ataasiakkaat suliartorrattut. Uffa tikikkattali taakku aqquserngit aqqutigisartakkagut inupparujussuarnik inoqartuaannaraluartoq. Ippassaq inukisaartupilussuuvoq. Unnuaq angerlaratta taanna misigisaq tupinnarpoq aamma, Ane Hansen New Yorkimiit tusagassiivoq.
