Ane Hansen borgmesterinngortussanngortoq
Qaasuitsoq Kujallermi Siumumeersup Enok Sandgreenip borgmesterinngortinneqarnissaanik Siumup Atassutillu isumaqatigiissuteqarsimanerat tallimanngormat nalunaarutigineqarpoq.
Atassummeersup Naja Petersenip Siumumeersullu Enok Sandgreenip KNR-imut tamanna uppernarsarpaat.
Inuit Ataqatigiilli Siumullu isumaqatigiinniarnerat ingerlaannarsimarpasippoq, tallimanngormammi unnukkut partiit taakku isumaqatigiinniarnerni aqutsisuisa, Hans Aronsenip Otto Jeremiassenillu tusagassiorfinnut nalunaarutigaat amerlanerussuteqartut nutaamik isumaqatigiissuteqartut Ane Hansenilu borgmesterissatut toqqarneqartoq.
AAMMA ATUARUK Enok Sandgreen borgmesterinngussaaq
- Qaasuitsoq Kujallermi qinikkat Atassummeersoq Siumumeersullu ilaat atsioqatigiillutik nalunaarneranni paasinarsisimavoq kommunalbestyrelsimut ilaasortassanit amerlanerussuteqartunit tunuliaqutserneqanngitsoq. Inuit Ataqatigiit taamaammat oqaloqatigisatsinnut isumaqatiginninniarnerit nangissimavagut amerlanerussuteqarluarlutalu isumaqatigiissusiornissarput aqqutissiussimallugug, Inuit Ataqatigiit Siumullu ataatsimoorlutik tusagassiorfinnut taama nalunaaruteqarput.
Inuit Ataqatigiinni qinersisartunit qinerneqarnerpaasup Ane Hansenip borgmesterinngortinneqarnissaa borgmesterillu tullia siulleq Siumumit inuttalerneqassasoq isumaqatigiissutigineqarpoq.
Qaasuitsoq Kujallermi amerlanerussuteqarlutik isumaqatigiissuteqartut tassaapput:
Inuit Ataqatigiinnit: Ane Hansen, Peter Olsen, Hector L. Sørensen, Aqqa Samuelsen, Hans Aronsen, Thomas Petersen aamma Niels Kristensen.
Siumumit: Jess Svane, Timooq Mølgård, Otto Jeremiassen, Kristian Jeremiassen aamma Kristian Broberg.
AAMMA ATUARUK IA-p Najap kissaatai tamasa neqeroorutigai
AAMMA ATUARUK Jess Svanep borgmesterinngunngitsoornini pakatsissutigaa
AAMMA ATUARUK Ane Hansen borgmesterinngoqqinngitsoortoq
