Anda Uldum Demokraatini siulittaasunngorpoq
Tamannalu Nuummi immikkut ataatsimeersuartoqarnerani ippassaq pivoq. Jens B. Frederiksenip nunatsinni politikkikkut sulineq qimappaa inatsisartuni ilaasortaajutigaluni atsitassarsiortitseqatigiiffimmi True North Gemsimi avatangiisinut isumannaallisaanermullu pisortatut atorfininnini pillugu isornartorsiorneqareersorlu.
Anda Uldumip, Demokraatit sinnerlugit Inatsisartunut ilaasortaasup Kommuneqarfik Sermersuumilu kommunalbestyrelsimut ilaasortaasup, partiip siunnerfigisimasaa ingerlateqqinniarlugu neriorsuutigaa. Demokraatillu politikkiata nunarput tamakkerlugu siammarterneqarnissaa suliassami siullersaattut isigaa.
- Nunap immikkoortuini immikkoortortaqarfiit eqeersimaartuunissaat kissaatigalugu oqaatigaara, taakkulu uanga siulersuunerillu nunarput tamakkerlugu oqaluuserisassanngortitsinissatsinnut ikiussavaatigut.
Demokraatit Inatsisartunut qinersinermi kingullermi angusarissaanngillat ilaasortaatitaallu sisamanit marlunnut affaannanngortinneqarlutik. Taamaakkaluartoq Anda Uldum isumalluarpoq.
- Politikkerput pitsaanerusumik siammartertariaqarparput - Demokraatit politikkiat upperaarput. Qinersisartunik isumasiuinerup kingulliup takutippaa siuarialaarsimasugut - taamaammat pitsaanerusumik ingerlavugut, tamannali naammanngilaq. Sulineq aallartittariaqarparput.
IA siornatigut naalakkersuisooqatigaarsi. Illit siuttunngorninni suleqatigiinneq taanna ingerlateqqinneqassava?
- IA-lu suleqatigiinnerput pitsaalluinnarsimavoq, siumoortumilli mattussereernianngilanga. Qanoq pisoqassanersoq utaqqimaaqqaalaarallartigu, qinersinerup kingorna oqaloqatigiinnerit pisarput taakkulu aallaavigalugit isumaqatigiissusiortoqartarpoq.
Demokraatit Aviaja Karlshøj Poulsen politikkikkut siulittaasutup tulliatut Ane Lone Baggerilu aaqqissuussaanikkut siulittaasup tulliatut aamma qinerpaat.
