Politikki

VIDEO Anda Uldum: Akileraarutinik qaffaanissaminik pilersaaruteqanngilaq

2015-imut aningaasanut inatsit Inatsisartuni suliarineqaleruttorpoq. Marlunngormallu aappaassaaneerneqarnerani Siumup oqaaseqartartuata Jens Immanuelsenip nuna tamakkerlugu akileraarutip procentimik ataatsimik qaffanneqarsinnaanera saqqummiuppaa.

Allattoq Sivert Olsen, Camilla Dam

apriilip 24-at 2015 13:19

Tamanna nunatta karsiata 78 millionit koruuninik pissarsiaqarfigisinnaassavaa, Siumullu aningaasat ilaatigut peqqinnissaqarfimmi pitsanngorsaanissamut atorusuppai.

Aningaasaqarnermulli naalakkersuisup Anda Uldumip naalakkersuisooqataasullu Demokraatit akileraarut maannakkutut inissisimatiinnarusuppaat.

- Akileraarutip allanngortinneqarnissaanik pilersaaruteqanngilagut, Anda Uldum KNR-imut taama oqarpoq.

- Taamatut oqaaseqareerlunga oqassuunga aningaasanik isertitsissutaasinnaasunik tikkuartuisimanerat (Inatsisartut, aaqq.) soorunami tusaatissatut tigugatsigu. Taanna ajunngitsumik eqqarsarluni pinerugaluarpoq, kisianni suliniutiginngilarput, Anda Uldum KNR-imut taama oqarpoq.

Aamma atuaruk Siumut: Nunatta aningaasaqarnera aaqqissappat nuanniitsut ilanngunneqartariaqarput

Akileraarutinilli qaffaanissaq naalakkersuisooqatigiinnissamik isumaqatigiissutaasumut naapertuutinngilaq.

- Inatsisartut arlaannik oqariartuuteqarsinnaatitaanerat ataqqilluinnarpara aamma akuleruffigissanngilara. Una oqallisissatut qaqippaat aamma tusaatissatut tiguinnartariaqassuarput. Kisianni oqareernittut taanna sulissutiginngilarput, aningaasaqarnermut naalakkersuisoq oqarpoq.

Peqqissutsimut naalakkersuisoqarfiup sipaarniarfissatut siunnersuutissai nutaat utaqqimaarneqarput

Illoqqortoormiuni, Qaanaami Qasigiannguanilu nakorsat sipaarutigineqarnissaannik siunnersuutaasoq sapaatit-akunnerata ingerlanerani taamaatiinnarneqarpoq. Aningaasallu sipaarniutigineqartussat allatigut nassaariniarneqartussaassapput, suminngaanneernissaallu maanna apeqqutaaginnalerpoq.

- Siusinnerusukkut oqaatigeriikkattut, naalakkersuisoqarfiit namminneq susassaqarfimminni aningaasat taakku ujartussanerlugit sumilu pissusissamisoornerpaamik ujartussanerlugit akisussaaffigivaat, taakkulu aningaasaqarnermut naalakkersuisoqarfimmut apuutissuaat.

Aamma atuaruk Aningaasanut Inatsit: Akileraarutip qaffanneratigut Nunatta karsia isertitaqassaaq

- Kisianni aningaasat taakku ujartorneqassapput, utaqqimaartariaqassuarput peqqinnissamut naalakkersuisoqarfimmit apuunneqarnissaat. Tamannalu qilanaaraarput, aningaasaqarnermut naalakkersuisoq taama naggasiivoq.

2015-imut aningaasanut inatsisissatut siunnersuut pilersaarutit malillugit maajip 20-ani pingajussaaneerneqassaaq.