Anda suli 10 millioner koruuninik tunniusserusuppoq

Kulturimut Naalakkersuisup, Mimi Karlsenip, Demokraatit siunnersuutaat aaqqiipallannertut ippassigami taareeraalu, qisuariaat una takkuppoq.

- Kulturimut Naalakkersuisup matumunnga atatillugu paasinngisaa tassaavoq, Demokraatit siunnersuutaat Inatsisartuni amerlanerussuteqartut tapersersoraat paasinarsimmat. Aammali nassuerutigisariaqarparput, aningaasat KNR-imut tapiissutiginiakkat suminngaanniit pissarsiarineqarnissaat isumaqatigiissutigineqarsinnaanngimmat, Anda Uldum tusagassiuutinut nalunaarummini allappoq.

2013-imi aningaasanut inatsisissamit taakku nassaarineqarsinnaasut Demokraatit aalajangiusimavaat.

- Aningaasat millionit koruunilikkaat taakku, KNR-imut tapiissutissatut kissaatigineqartut, pillugit partiinik allanik isumaqatigiissuteqarniarnissarput qilanaaraarput. KNR nukittooq, tusagassioriaatsimik pitsaasumik tusarliussisartussatut avataaniit piumaffigineqaleraluttuinnartoq, taamaaliornissaminullu atortussalik, politikeritut qulakkiissagipput, kikkut tamat soqutigissagaat ilimagaarput, Anda Uldum oqarpoq, Mimi Karlsenilu isumaqatigiinniarnissani peqataaqqullugu kaammattorlugu.