Anda: Aningaasaqarnerput pitsaaneruliinnarsinnaavoq
Kalaallit Nunaata aningaasaaqarnera eqqarsaatigalugu ukioq 2014 pitsaasutut oqaatigineqarsinnaanngilaq. Sinneqartoornissamik naatsorsuutigisaqarneq amigartooruteqarnermik inerneqarpoq aatsitassarsiornerullu aallartisarnissaanut isuma ungasinnerulerluni.
Tamanna pillugu Aningaasaqarnermut naalakkersuisoq, Andreas Uldum ima oqarpoq.
- 174 millioner koruunit missaanniittut suliffissaaleqinerup annikillisarneqarnissaanut atorneqarput taassumalu saniatigut tupamik imigassanillu atuinikinnerulersimalluta taamaalilluni isertitat annikilleriarsimallutik.
222 millioner koruuninik siorna amigaartooruteqarneq
Suliffissaaleqinerulli akiorniarneqarneranut aningaasaliissutit siorna 2014-mi kinguaattoornerit pissutaallutik atorneqarpiannginnerinut Nunatta karsiata 222 millioner koruuninik siorna amigartooruteqarnera, Aningaasaqarnermut Naalakkersuisup naqissuserpaa.
Suliffissanik pilersitsisoqassaaq
Tassalu aningaasat sinneruttut, 120 millioner koruuniusut ukioq manna suliffissaaleqinerup akiorniarneqarneranut atortussaassasut, Andreas Uldumip oqaatigalugu.
- Taakku 120 millioner koruunit ukioq manna aatsaat atorneqartussaasut eqqaamaneqartariaqarpoq, taamaattumik tamassuma arlaatigut pitsaaqutaat takkutissasut naatsorsuutigilluinnarpara.
Pitsaaqutit kommunit pitsaanerusumik aningaasaqalernerannut aamma sunniuteqassasoq, Aningaasaqarnermut Naalakkersuisup naatsorsuutigineqarpaa.
Nunatta aningaasarliorneranut pissutaaqataasut ilagaat, 2014-mi sanaartortoqanngivissorsimanera. Tassa 2013-mi 773 millioner koruunit sanaartornermut atorneqartut siorna taamaallaat 396 millioner koruunit atorneqarsimapput.
1 milliard koruunit sinnerlugit suli atorneqanngillat
Tamatumalu inerneraa, sanaartornermut aserfallatsaaliuinermullu aningaasaateqarfimmiittut maanna, 1 milliard koruunit sinnerlugit uninngasuutigineqalerneri. Taakkulu allanut atorneqartussaanngillat taamaattumillu tassa uninngasuutaaginnalerlutik.
Ukioq mannali snaartugassat annertuut marluk pilersaarutit ilaatigut aallartereersimapput, tassa Nuummi umiarsualiviup allineqarnissaa taamatullu Nuummi parnaarussivissaq, taanna danskit naalagaaffianit aningaasalersorneqartoq. Taakkulu sanaartugassat isumalluarnartuusut, Andreas Uldumip oqaatigaa.
Aserfallatsaaliuinerit annertuut pilersaarutaasut Naalakkersuisunit aamma siunertarineqarpoq. Tamannalu suliffissanik pilersitsissasoq naatsorsuutigineqarluni. Tassalu suliffissanik pilersitsiniartoqarniarnerani aningaasat illoqarfinni sorlerni inissianik aserfallatsaaliinernut atorneqassasut apeqqutaaginnalersoq, Andreas Uldum oqarpoq.
- Taakku illoqarfinni minnerni suliffissaaleqinerup akiorniarneqarneranut atortussatut illuartinnikuuvagut.
Aningaasaqarnermut Naalakkersuisoq, Andreas Uldum oqarpoq.
Missigersuutit pillugit inatsit nutaaq ukiamut saqqummiunneqassasoq Naalakkersuisunit neriuutigineqarpoq. Taamaaliornikkut sanaartugassat pitsaanerusumik illoqarfinnut nunaqarfinnullu agguataarneqarnissaat neriuutigineqarluni aamma sanaartornermut aserfallatsaaliuinermullu aningaasaateqarfimmi aningaasat amerligaluttuinnannginnissaat taamaalilluni pakkersimaarneqarnissaat anguniarneqarluni.
