Anda aningaasaateqaraluarlutik akiitsulinnut akileeqqusivoq

Innuttaasut pisortanut akiitsui 932 millionit koruuniupput. Innuttaasunilu ilaqarpoq akiliisinnaagaluarlutik akiliinngitsuuinnartartunik. Taakku akiligassatik akilertalissagaat, aningaasaqarnermut naalakkersuisoq Andreas Uldum kaammattuivoq.
maajip 21-at 2015 17:18

- Innuttaasuni akiliisinnaassuseqaraluarlutik akiliisannginnerat kipiluttunartupilussuuvoq. Akiitsoqalernianngikkaanni akissaqartilluni soorunami akilerneqartarnissaasut kaammattuutigiinnartariaqassaaq, Andreas Uldum oqarpoq.

Qaasuitsup Kommunianilu borgmesteria Ole Dorph siusinnerusukkut pissutsinik allannguisoqartariaqarneranut Andreas Uldummitulli kaammattuuteqarnikuuvoq.

Aamma atuaruk Aningaasaateqaraluarlutik akiitsoqalertartut

Andreas Uldumillu akiligassat akilerneqartarnissaannut innuttaasut ataasiakkaarlutik namminneq akisussaaffigigaat ersersinniarpaa.

- Akiitsut akilerneqarnissaannut Namminersorlutik Oqartussanut akisussaaffimmik inissiisoqarniarnera eqqorpallaanngilaq. Ataasiakkaat akiitsutik namminneq akisussaaffigivaat, Andreas Uldum oqarpoq, ilanngullugulu oqarluni, Namminersorlutik Oqartussat aamma akisussaaffeqartut.

- Soorunami akisussaaffeqarpugut. Akisussaanerpaajusorli tassaavoq akiitsulik. Kisianni soorunami ikorfarttussaavagut, nalunnginnatsigumi aamma innuttaasorpassuaqartoq akiliisinnaassuseqarpianngitsunik. Taamaammat suliniutit arlallit aallarnisassapput, Andreas Uldum oqarpoq.

Naalakkersuisut kommunillu pilersaarusiamik pilersitsinikuupput.

Aamma atuaruk Pilersaarusiap akiitsut ikilisissavai

Suliat akileraartarnermut allaffeqarfimmit suliarineqartut assigiiaarnerulernissaat piginnaassuseqarnerusumillu suliarineqarnissaat, akiitsoqalersitsinaveersaarnermut suliaqarnerulernissaq, Kiffaq - kontumullu assingungajattumik pilersitsisoqassasoq, pilersaarusiami anguniakkatut ilaatigut allaqqapput.

Suliniutilli sorliit immikkut suliarineqarniarnersut, Andreas Uldumip suli oqaatigisinnaanngilaa.

- Suliaq naammassereerpat annerusumik oqaaseqarfigissavara, Aningaasaqarnermut naalakkersuisoq Andreas Uldum oqarpoq.

Aamma atuaruk Pisortanut akiitsut amerliartupiloortut