Anaana ataatalu aningaasaateqanngikkaangata meeqqat ajorsartuusarput

Ilaqutariit Isaksenikkut niuerniassagaangamik aningaasaateqarpallaarneq-ajorput
 
- Akikillisaannarnik pisiniartarpunga, Didda Isaksen oqarpoq.
 
Didda Isaksen, pingasunik qitornaqartoq kisimiittuullunilu Qaqortumi najugaqartoq taama oqaluttuarpoq. 4.000 koruunit sinnilaarlugit qaammammut inuussutigisassaraat, atisallu nutaat allallu akissaqartinneqanngikkaangata oqitsuinnaaneq-ajorpoq.

AAMMA ATUARUK Innuttaasut 4 procentii inuussutissaqanngingajattut

- Meeqqakka sinngallutik angerlartarput. Qanoq-iliuuseqassalluni nalunarpoq, Didda taama oqaluttuarpoq.
 
Jonna Ketwa Red Barnetip Nunatsinni immikkoortortaqarfiani siulersuisuni siulittaasuuvoq ilaqutariillu Diddakkutut ittut ulluinnarni ikiortarpai.
 
- Siullertut, pingaaruteqarpoq ilaqutarinnik taamatut inuusoqarnera ilumoorulluinnassallugu. Kalaallit Nunaanni meeraqarpoq taamatut atugaqartunik, taamaammat iliuuseqarfiginissaanut tamatta akisussaaffeqarpugut, Jonna Ketwa taama erseqqissaavoq.
 
Diddami kisiartaalluni ulluinnarni taamatut atugaqartuunngilaq. Angajoqqaat kisimiittut 194-it aningaasaatikilliortuupput, meeqqallu taamatut atugaqartitaallutik peroriartornerat annertuupilussuarmik kingunerlutsitsisinnaavoq, Jonna Ketwa, ulluinnarni tarnip pissusiinik ilisimasalittut suliaqartoq taama oqaluttuarpoq.
 
- Amerlanertigut matoqqanerulersarput. Ikinngutitaarnissartik ajornakusoortittarpaat. Meeraqatimisulli periarfissaqartiginngilallat. Nalinginnaasumillumi nammineq naleqassutsimik misigisimanerannut sunniuteqartarpoq aamma ineriartornerannut sunniuteqartarpoq ineriartornissamut allatulli periarfissaqannginnamik, Jonna Ketwa taama oqarpoq.
 
Red Barnet meeqqat aammalu ilaqutariit ataatsimoortillugit aaqqissuussisarpoq, piffissamilu matumanerpiaq immikkut iliuuseqarnissamut pingaaruteqartoq, Jonna Ketwap oqaatigaa.
 
- Pingaartumik juullip nalaani ernumanartuuvoq, imaassinnaagami pisariaqartitatik pisinnaanngikkaat, Red Barnetimi siulittaasoq taama oqarpoq.