Amundsenip umiarsuaa Aasianni ukiissasoq

Issittumi umiarsuaq ”Maud” ukiunik hunnorujunik pisoqaassusilik maanna Aasianniippoq. Umiarsuup qisummik sanaajusup Norgemut ingerlaarnermi naggataa ingerlaffigitinnagu nunatsinni ukeeqqaassaaq.

- Angalanerput alutornaqaaq. Iqaluktuuttiamiit sapaatip akunneri pingasut matuma siorna Sullualukkoorpugut, Sullualummi aasaq manna assut sikoqarpoq.

Roald Amundsenip umiarsuaata Nunavummi Iqaluktuuttiamiit Norgemukaanniarnerani suliniummi pisortaq, Jan Wanggaard taama oqarpoq. Suliniut tamanna 2011-mi aallartinneqarpoq.

Amundsenip umiarsuaa

Umiarsuaq Maud Norgemiumut issittumi ilisimatusartumut, Roald Amundsenimut ukiut hunnorujut matuma siorna sananeqarpoq. Amundsenip 1918-imiit 1924-mut ilisimatusarnermini umiarsuarmik Qalasersuaq tikinniaraluarpaa.

Amundsenilli Avannaarsuata kangimut aqqutaartigooriarluni anguniakkani taamaatiinnartariaqarsimavaa. Aningaasassaaleqinerlu pissutigalugu umiarsuaq Maud suliffeqarfimmut Hudson Bay Companymut tunivaa, suliffeqarfiup umiarsuup Nunavummi nunaqarfiup Iqaluktuuttiap eqqaani 1931-mi kivinissaa tikillugu imerpalasunut toqqorsivittut atorpaa.

Ilisimasassarsionermik oqaluttuaq pissanganartoq

Maudip immap naqqaniitsiinnarnissaa pakatsinartuussasoq, Jan Wanggardip nassuiaatigaa.

- Maudimik ilisimassarsiornermut oqaluttuaq pissanganartuuvoq, Amundsenillu ilisimasassarsiornerata assilialernissaanut taanna taperseeqataasinnaavoq.

Maud Norgemiunit eqimattanit immap naqqaniit siorna qaqinneqarpoq, Maudillu Norgemut aqqut takisooq aasaq manna aallarnerpaa.

- Maud tassaavoq umiarsuit qisummik sanaajusut aserujaannerpaat ilaat. Taamaammat Maudip Norgeliaannera alutornarluinnartumillu oqaluttuassaqalernera nuannaarutigaarput.

Norgemiut suliffeqarfiat Tandberg Eiendom Maud pillugu suliniuteqartuuvoq. Umiarsuup Katersugaasivissami Maudimi takusassiaalernissaa siunertaavoq.