Ammoniak Nuummi umiarsualivimmi aniasoq
Royal Greenlandip tunisasiorfiani umiarsualivimmiittumi ammoniak tallimanngornermi ullaakkut nal. arfineq pingasup missaani anialerpoq, aqqusernillu assersorneqarput. Aqqusernit nal. qulinut qiteqquttoq ammaqqinneqarput.
Allattoq Jens Thorin
Royal Greenlandip tunisassiorfiani kalerrisaarut aallartimmat, Nuup umiarsualivianut aqqusernit politiinit ullaaq nalunaaqutaq arfineq pingasup qaangilaannguaraa assersorneqarput.
Qatserisartut takkummata, ammoniakkimik aniasoqartoq paasinarsivoq. Ventili ajoqusersimasoq nassaarineqartoq iluarsineqarmat, assersuineq nalunaaqutaq qulinut qiteqquttoq taamaatinneqarpoq.
Nuummi politiini pingaartut ittuata Aqqaluk Petersenip inunnik ajoqusertoqanngitsoq oqaatigaa.