Ammerineq kalattoornerlu Nuummi nuannarineqarluarput
Nunatsinni illoqarfiit annersaanni kalaallisuuliorluni ammerineq soqutigineqarluarpoq allaat 41-t peqataarusuttut holdinut marlunut avillugit ilinniartinneqassallutik. Ilinniarneqarsinnaasut ilgaat naqqaniit ammerineq aamma kalaallisuuliorluni mersorneq.
Puisip amiinik assammik mersorluni tunissutissaliornissamut periarfissaq aamma tigulluarneqarsimavoq. Soorlu amernik aaqqatiliorneq, isersimmatiliorneq aamma amernik uummataasaliorneq. Inersimasut 27-it aallarterlaatut amermik suliaqarnissamut soqutiginnillutik nalunaarsimapput.
Sunngiffimmi inersimasunut atuartitsinermut peqataarusullutik nalunaarsimasut 442-ut Kommuneqarfik Sermersuumi susassaqartitsinermut siunnersortip Gustav Brandt-ip qujaruppai.
- Ajunngivippoq taama soqutigineqartiginera, sunngiffimmi sammisassaqartitsinermut siunnerti Gustav Brandt oqarpoq.
Kinamiut oqaasiinik ilinniarneq
Nuummi innuttaasut allamiut oqaasiinik ilinniarnissartik aamma soqutigaat. Oqaatsit ilinniarneqarsinnaasut soorlu kalaallisut, spanskit oqaasii aamma kinamiut oqaasii qinnuteqarfigineqarluarsimapput. Qallunaatut oqaasilinnut aallarterlaanut kalaallisoorneq inersimasunit 35-init peqataaffigineqarusussimavoq. Spaniamiut oqaasiinik ilinniarusullutik inuit 24-it qinnuteqarsimapput.
- Kina-miut oqaasiinik ilinniartitsineq aatsaat januarimi aallartissaaq, ilinniartitsisussaagaluat Kinaliartariaqalersimagami. Arfineq pingasut peqataarusullutik nalunaarsimagaluarput, susassaqartitsinermut siunnersorti Gustav Brandt oqarpoq.
Mavedansi kalattoornerlu
Nuummi arnat sunngiffimminni timimik aalatitserusuttut malunnarpoq. Arnat 12-it aallaterlaanut mavedansimut peqataanissamut nalunaarsimapput, sungiussilaareersimasunulli mavedansimut peqataanissamut qinnuteqarsimasoq massakkumut ataasiinnaavoq. Sulili inuit periarfissaqarput peqataarusukkunik nalunaarnissamut. Qiteriaaseq alla tassaasoq kalattoorneq mavedansimiillu allaat nuannarineqarneruvoq.
- Kalattoorusullutik qinnuteqarsimasut 22-inngorput, kalattoortitsisartulli nalunaarput 40-ut angullugit nalunaartoqassappat tamarmik tikilluaqqusaakutsoortut, Kommuneqarfik Sermersuumi sammisassaqartitsinermut siunnersorti Gustav Brandt oqarpoq.
Januarimi sunngiffimmi inersimasunut atuartitsinermut neqeroorutit allat decembarimi Nuuk Ugeavisikkut saqqummiunneqarumaarput.
