Ammassassuarniarneq rekordiliiffiusoq

Aammassasuartassiissutit 20.000 tonsiusut tamakkerneqangajalerput. Ammassassuit 17.267 tonsit aalisarneqareerput, Kalaallit Nunaanni Aalisarsinnaanermut Akuersissutinik Nakkutilliisoqarfimmi atorfilik taama oqarpoq.

Ammassassuartassat tamakkerlugit aalisarneqarpata nunatta karsia akitsuutitigut 5 millionit koruuninik isertitsissaaq. Aningaasanut inatsimmi ammassassuit akitsuutaannit 3,5 millionit koruunit  Naalakkersuisunit missingersuutigineqaraluarput.

Siorna ammassassuit 11.000 tonsit sinnilaarlugit aalisarneqarput, ukiormannalu ammassassuarnerup iluatsilluarneranut pissutaasut arlaqarput.

Ukioq manna ammassassuarniarneq siornamut sanilliullugu sapaatip akunneri marluk missiliorlugit siusinnerusukkut aallartippoq, aammalu kiilumut akitsuut  0,25 koruuniuvoq.

Avaleraasartoorniarnermi kiilumut 0,95 koruunimik akitsuuteqarput.

Ukiormanna ammassassuarniarnermi kalaallit angallataat arfineq-pingasut savalimmiormillu angallataat ataaseq peqataapput, aviisi Sermitsiaq ullumi saqqummersoq taama allaaserisaqarpoq.