Ammassalik pillugu tuaviortumik ataatsimiipput
Ikaarsaariarnermi ataatsimiititaliami siulittaasoq Asii Chemnitz Narup, Ammassallip aningaasaqarnikkut inissisimanera pillugu tuaviortumik ataatsimiinnissamut, aqagu sisamanngornermi Nuummi ingerlanneqartussamut, aggersaavoq.
maajip 21-at 2008 17:14
Ammassallip kommuneata 18,4 million koruuninik atorniarneranut itigartitsigaluarluni Asii Chemnitz Narup-ip aningaasanik nassaarniarnissaq isumalluarfigaa.
- Nuannaarutigaara kommunet nakkutilliisuisa sulisui taama sukkatigisumik qisuariarlutik Ammassallip kommuneanut paasisassarsiupallammata, Asii Chemnitz Narup oqarpoq. Maannakkut ajornartorsiutigineqartut pillugit qulaajaaneq malinnaaffiginiarlugu aalajangerpugut, akisussaaffik ukioq nutaamiit uagutsinnut tunniunneqartussaammat, Asii Chemnitz Narup oqarpoq.
Asii Chemnitz Narup juunip ulluisa aqqarnganni Tasiilamukassaaq, kommunalbestyrelsemut ilaasortat aamma innuttaasut qanimut oqaloqatigiartorlugit.
