Qulaarpaa Amerlasuut toqunissartik toqqartarpaat

Nunatsinni ukioq kingulleq inuit 43-t imminut toqupput. Aasaq Qaqortumi imminut toquttut amerlapput, amerlasuullu nikallungallutik inuunermullu kajumippallaaratik inooqataapput.
februaarip 09-at 2015 10:49

Imminut toquttut ukiorpassuarni tusarsaajuarput. Sulilu pissutsit taamaapput. Imminut toquttartut ikiliartunngillat, qanorlu ililluni imminut toquttartut ikiliartortinneqassanersut suli maannamut paasineqanngilaq.

Maannalu Qulaarpaami inuup toqu toqqaraangagu susoqartarnersoq sammissavarput.

 

Kisitsisinngorlugu

Ukiorpassuanngortuni nunatsinni imminut toquttartut amerlassusaat nunanut allanut sanilliullugu amerlasoorujussuusarput. Sulilu taamaalluni.

2014-imi inuit 43-t imminut toqupput. Naliginnaasumik agguaqatigiissillugu inuit 50-it ukiumut imminut toquttarput.

Kisitsisillu taakku takutippaat kalaallit Canadamilu naggueqatigiit Inuit nunarsuup sinnerani inunnut allanut naleqqiullugit imminut toquttartut amerlaneroqisut.

Aamma atuaruk Imminortoqarsimatillugu ikiuinissaq ajornakusoorpoq

Imminut toquttartut amerlaqisut saniatigut inuit amerlasuut ukiut tamaasa imminut toqoriartarput. Politiit kisitsisaataat malillugit ukioq kingulleq imminut toqunniarlutik siorasaarisut, politiinut saaffiginnissutigineqartut, imminullu toqoriaraluartut 637-usimapput. Tassa politiinut saaffiginnissutigineqartuinnaat, kisitsimmi tassani ilaanngillat napparsimaveqarfimmut saaffiginnittut imaluunniit sianerfissanut, oqarasuaatikkut siunnersuiffinnut, sianersimasut.

Aamma atuaruk Kalaallit Nunaanni imminortut amerlavallaarput

Kisitsisit taakku Kalaallit Nunaanni Naatsorsueqqissaartarfiup kisitsisaatigai kialluunniit ujartorsinnaasai. Kisitsisit pisut alianartut qanoq amerlatiginerinik takusitsisut. Kisitsisit qatanngutit, ikinngutit qitornaallu imminut toquttut amerlassusaannik takutitsisut. Kisitsisit qimagaasunik aliasuttunik, naalliuttunik, kiserliortunik, maqaasisunik qanoq iliiusissaaruttunik ilaatigullu namminneq imminnut toqunnissaminnik eqqarsalersimasunik takutitsisut.

 

Qulaarpaami sammineqassaaq

Imminut toquttarneq oqallisigineqarujussuartareerpoq, kisitsisilli allanngorneq ajorput.

Soorliuna ukiut tamaasa tusartaraluarlutigit, imminut toquttartut ikiliartunngitsut? Iliuuserisagut amigarpat?

Sapaatip akunnerani matumani Qulaarpaami imminut toquttarneq, Radioaviisimi Qanoruumilu ilanngutassiisarluta, sammissavarput.

 

Saaffissat

Nikallungaguit Paarisap nuna tamakkerlugu oqarasuaatikkut siunnersuiffianut Attavimmut sianersinnaavutit, normoraa 146. Imaluunniit meeqqaat oqarasuaataannut 134-imut sianerlutit oqaloqateqarsinnaavutit.