Amerlanerussuteqartut KNR aningaasaliiffigeqqikkusuppaat
Demokraatit siunnersuutaat malillugu 10 millionit koruunit KNR-imut tunniunneqartussat iluanni 5 millionit koruunit Inuit issittormiut siunnersuisooqatigiiffiannut ICC-mut aningaasaliissutit nuunnerisigut pisinnaasoq.
Tamannali IA-kkut ilalernartuutinngilaat.
- IA-miit soorunami isumaqatiginngilarput aningaasat ICC-mit aaneqarnissaat. Suliniaqatigiiffiit ICC-tut ittut pisariaqaleruttorfianni aningaasaliissutit tassanngaanniit peerneqarsinnaanngillat, IAp politikkikkut oqaaseqartartua Aqqaluaq B. Egede KNR-imut oqarpoq.
Aggustip 24-at KNR-imi siulersuisut siulittaasuata Hans Peter Poulsenip aamma KNR-ip pisortaata Ivalo Egedep nalunaarutigaat sipaarniarnissaq KNR-ip avaqqussinnaajunnaaraa.
Atorfiit aqqanillit atorunnaarsinneqassapput. Atorfiit inuttaqanngitsut pingasut inuttaleqqinneqassanngillat sulisullu arfineq pingasut soraarsinneqarput.
IA-meersoq Aqqaluaq B. Egede nalunaarpoq KNRip sullissinera allanngortinngikkaluarlugu oqaloqatigiinnikkut siunissaq qulakkeerneqarsinnaasoq.
- KNRip sullissinnera annikillissanngippat Naalakkersuisut, Inatsisartut imaluunniit KNR-mi sulisut suleqatigiilluni KNR ajornartorsiorneraniit ikiortariaqarpaat taamaasilluta naqisimaneqanngitsumik tusagassiissarneq demokratilu ingerlaannarsinnaaniassammata, Aqqaluaq B. Egede oqarpoq.
Naalakkersuisooqataasulli Kattusseqatigiit Partiiat allaanersumik isummersorput, taakkumi isumaqarput taxa-tilinnut tapiissutit peernerisigut KNR ikiorserneqarsinnaasoq.
- Taxa-titaartut landskarsimit 50.000 koruuninik tapiiffigineqartarput. Taamatut tapiissuteqariaatsip oqaluusereqqinnissaa Kattusseqatigiit Partiiannit kissaatigaarput. Eqqarsarnartoqartipparpummi taxaatillit tapiiffigineqarlutik taxamik pisinermiit ukiut marluk qaangiunneranni taxa tuneqqittaraat iluanaarutigilluarlugu, Knud Fleischer Kattusseqatigiit Partiiannit oqarpoq.
KNR-imut aningaasaliissutit ilanissaannut Atassut allaanerusumik iliuuseqarniarpoq, taakkumi kissaatigaat pisortat allaffissornermut aningaasartuutaat ilanngarlugit aningaasat nassaarineqarsinnaasut.
Partiip siulittaasua Gerhardt Petersen oqarpoq taamasiornikkut 6 millionit koruunit nassaarineqarsinnaasut. ICC-mullu aningaasaliissutit ilanngarneqassappata taava 1 millionit koruunit tassanngaanniit aaneqarsinnaasut oqaatigaa.
