Amerlanerussuteqartut IA-kkut siunnersuutaat taperserpaat
IA-meersup folkitingimut qinigassanngortittup Aaja Chemnitz Larsenip Meeqqat sumiginnagaasut pillugut arfineq pingasunik siunnersuuteqarpoq. Ilaatigut Ikiuigasuarnissamut aningaasaateqarfimmik siunnersuuteqarluni.
Suli itinerusumik eqqartorneqartariarqartoq Demokraatit isumaqarput:
- Itisilerlugit tusarusunnartorujussuupput taammatut eqqarsarnarpoq. Soorunalimi takuinnarlugit isumaq pitsaavoq, taamaammat itisilernerullugit tusarusunnartorujussuupput, Nivi Olsen taama oqarpoq.
Siumukkut tapersiillutik aamma oqaaseqarput.
- Isumassarsiaq taanna tapersernartutut uanga aamm nalilerpara, Jens Erik Kirkegård taama oqarpoq.
Siunnersuuteqartormi isumaqarpoq naammaleqaaq:
- Suliassaqarfik taanna ukiorpassuarni oqallisigereerparput, aningaasarpassuarnillu atuiffigereerparput. Nassuerutigisariaqarparpullu iliuutsigisavut naammanngitsut.
Massakkut Folketingimut ilaasortaq Aaja Chemnitz Larsen taama oqarpoq nangillunilu, tigussaasunik suliniuteqartoqannginnera pakatsissutigisimallugu.
AAMMA ATUARUK Atornerlugaasunut ikiuigasuarnissamut aningaasaateqarfiliornissaq Aaja Chemnitzip siunnersuutigigaa
Ilaatigut siunnersuutigaa ilaqutariit ukioqanngitsuniit marlunnik ukiulinnik meerallit ilitsersorneqarfigisinnaassaannik najugaqarfigalugu atuarfeqalernissaannik siunnersuut.
Aamma siunnersuutigineqarpoq suleqatigiit angalallutik suligasuartartussat pilerinartumik atugassaqartinneqarlutik atorfinitsitassat pilersinneqassasut, taakku suliassarissavaat innuttaasut eqqugaasut assersuutigalugulu nutsernissaq tarnillu pissusiinik ilimasalinnit passunneqarnissaq pillugit qanoq annertutigisumik pisariaqartitsisoqarnersoq misissuiffigissallugit.
Aaja Chemnitz Larsenip naatsorsuutigaa siunnersuut 100 milliuunit koruuninik missaannik naleqassasoq:
- Isumaqarpunga aningaasat sumit pissarsiarinissaat apeqqutaavallaanngitsoq. Aallartinnissaq pingaarnerpaavoq, taamaattumimmiuna tigussaasunik tikkuaasunga. Aammami isumaga malillugu naammaleqaaq, Aaja Chemnitz Larsen taama oqarpoq, ilanngullugulu oqaatigaa aningaasaliissutit annersaat Danmarkimeersuunissaat. Taassuma naliliinera tunngavigalugu 80 milluunit koruunit Danmarkimit pissarsiarinissaat ajornartorsiutaanavianngilaq taavalu 20 milliuunit koruunit sinneruttut nunatsinniit aningaasaliissutigalugit.
