Amerlanerussuteqarluartut kommunip avinneqarnissaa taperserpaat

Qaasuitsup Kommuniani innuttaasut affaannai - 52 procentit - kommunerujussuup siunissaa pillugu isummerfiusumik ippassaq taasisitsisoqarnera peqataaffigaat.
marsip 26-at 2014 04:33

Taakkunanngali amerlanerussuteqarluartut qulanngillat.
 
Qaasuitsummi Kommuniani innuttaasut amerlanerussuteqarluartut - 79 procentit - nunarsuarmi kommunit annersaata avinneqarnissaanut angerput. 21 procentiinnaallu avinneqarnissaanut naaggaarlutik.
 
Angertut 5.135-iupput, 1.366-it naaggaarlutik 6.000-illu sinnilaarlugit taasiartorsimanngillat.
 
Innuttaasunilli taasisitsineq isummerfiuinnartussaavoq, kommunillu avinneqarnissaa piviusortinneqassanersoq oqaatigineqarsinnaanngikkallarpoq.
 
Taasisitsinerummi inernera kommunalbestyrelsimi eqqartorneqaqqaassaaq, tamatumalu kingorna Naalakkersuisunut inassuteqaammik tunniussisoqassalluni.
 
Kommuni avinneqassanersoq imaluunnit avinneqassanngitsoq Unatsisartut kisimik aalajangiiffigisinnaavaat.
 
Aningaasaqarnermut Nunami namminermullu naalakkersuisup Vittus Qujaukitsup tamatuma aalajangiiffigineqarnissaa sivisuumik utaqqineqartariaqassasoq oqaatigaa. Naalakkersuisummi kommunit angissusaat 2015-imi aatsaat nalilersuiffigisussaavaat.
 
Kommunip avinneqarnissaanik akerliusut taaseqataasut ikitsuinnaarnerat innersuussutigissagunavippaat. Taasisinnaasummi 52 procentiinnai taasisitsinermut peqataapput.