Amerikap nunavittaani 2018-imi unammersuarnerit Nunatsinni ingerlanneqartussaasut
Kalaallit Nunaanni Assammik Arsartartut Kattuffia inisimatitsusuunissaminik qinnuteqarpoq, amerikallu nunavittaata assammik arsarnermik kattuffiata Buenos Airesimi ataatsimiinnerani unammersuarnerit inissisimaffissaat pillugu taasititsisoqarmat Nunarput 17-init taaneqarpoq, Chile arfineq-marlunnit taaneqarluni.
Timersornermik soqutigisaqartut taamaalillutik amerikap nunavittaani assammik arsarlutik unammersuarnerit Nunatsinni ingerlanneqarnissaat qilanaarisinnaanngorpaat.
Amerikap nunavittaani assammik arsarlutik unammersuarnerni nunat aqqaneq-marluk peqataassapput.
Kalaallit Nunaanni Assammik Arsartartut Kattuffianeersup, Kurt Lauritsenip tamanna ualeq manna nalunaarutigaa.
Kattuffiullu siulittaasuata, Nuka Berthelsenip nalunaarutigineqartoq nuannaarutigivaa.
- Amerikap nunavittaani assammik arsarnermi unammersuarnerit aaqqissuussisussaannut taasititsisoqarmat Nunatta ajugaaneranik nuannaarutigisannik nalunaarfigineqarpunga. Timersornerni Nunatsinnit ingerlanneqartuni tamani anginerpaajussaaq, Kalaallit Nunaanni Assammik Arsartartut Kattuffiatalu namminwq unammisarfitsinni nunat tamalaat unamminissaannik kissaataata piviusunngortinnissaanik periarfissiivoq, Nuka Berthelsen suliassamut angisuumut qilanaartoq oqarpoq.
- Unammersuarnissat pilersaarutigineqarnissaannut ukiuni marlunni ilungersorluta sulinissarput tullinnguuppoq. Suliniullu inuussutissarsiortunit, kommunimit Namminersorlutik Oqartussaniillu tapersersorneqarnissaa neriuutigaara, soorlu Arctic Winter Gamesimut tapersersuisut takoreerigut. Nunatta nittarsaanneqarnissaanut suliamillu angisuumik kivitsisinnaanitta takutissinnaanissaanut imaannaanngitsumik periarfissaqaqqilerpugut, Nuka Berthelsen oqarpoq.
