Amerikamiut Pituffik pillugu suliami kukkunertik nassuerutigigaat

USA-mi nunanut allanut ministerip, John Kerryp tallimanngormat Nunatsinnut tikeraarnerani Pituffimmi kiffartuussinissamik isumaqatigiissut oqaluuserineqarpoq.
Assi © : KNR
juunip 20-at 2016 09:00
Nutserisoq Ivik Kristiansen

Pituffimmi kiffartuussinissamik isumuqatigiissut John Kerrymit, Vittus Qujaukitsumit Kim Kielsenimit Kristian Jensenimiillu sakkutuut umiarsuaanni Thetisimi oqaluuserineqarpoq. Danskit nunanut allanut tunngasunut ministeriat, Kristian Jensen ataatsimeeqataareerluni KNR-imut oqarpoq.

Kristian Jensenilu naapertorlugu, Exelis Servicesip suliariumannittussarsiuussinermi 2014-imi ajugaanera, USA-mit kukkusoqarneranit pissuteqarsimasoq, John Kerryp oqaatigaa.

- USA-mit kukkusoqarsimasoq amerikamiunit erseqqissumik nalunaarutigineqarpoq, Kristian Jensen oqarpoq.

Suliariumannittussarsiuussinerup nalornissutigineqartup kingorna Greenland Contractorsip kiffartuussinissamik isumaqatigiissutaa sivitsorneqarallarpoq, sulilu maanna kiffartuussisuulluni. Tamannalu naammaginartuusoq, Kristian Jensen isumaqarpoq.

- Suliap eqqartuussisutigoortup ingerlanerani, isumaqatigiissut pisoqaq suli atuuppoq, isumaqarpungalu neriuutigineqartunut naleqqiullugu naammaginartoq. Suliap eqqartuussisutigoortup naammassinissaa ullulerneqarsimanersoq ataatsimiinnitsinni apeqqutigaara, taamaattoqarsimanngilarli. Qaammatit arlaqanngitsut qaangiuppata naammassissasoq ilimagineqarpoq, ullulerneqarnikuunngilarli, Kristian Jensen oqarpoq.

Aamma atuaruk  PITUFFIK Eqqartuussisoq: Exelis Servicesip piumasaqaatit naammassivai

Suliffeqarfiit Greenland Contractors, Per Aarsleff Copenhagen Arcticilu USA-mi sakkutuut timmisartortartut pillugit eqqartuussisutigoortumik suliaqartitsipput. Suliarlu taanna naammassineqartinnani oqaaseqarfiginerussallugu sapernartoq, nunanut allanut tunngasunut misineterip oqaatigaa.

- Taamaammat suliap eqqartuussisutigoortup naammassinissaata tungaanut Kalaallit Nunaata, Danmarkip USA-llu atassuteqarnerata ammasuutinnissaa maanna suliassaraarput, Kalaallit Nunaata kiffartuussinissamik isumaqatigiissut tigummiinnarnissaa qulakkeerneqarniassammat, taamaalillunilu Kalaallit Nunaata aningaasaqarniarneranut, suliffissaqartitsiniarneranut ilinniartitaqarneranullu iluaqutaasussamik sukkasuumik alloriaqqissinnaaniassagatta, Kristian Jensen oqarpoq.

AAMMA ATUARUK Suliariumannittussarsiuussinermut malittarisassat nutaat Namminersorlutik Oqartussat akuerisimavaat