Takornariat Nunatsinnut tikittartut amerlanersaasa takorusuttagaat tassaapput, iluliarsuit portusuut imaani arriitsunnguamik ingerlaartut akornannilu uumasut imarmiut soorlu arferit aqqarnerminni sarpissui kusanarluinnartut.
Allalli timersorlutik golferusunnerusarput.
Periartoq tassaava, amerikami Californiami illoqarfissuarmi Los Angelesimi najugaqartoq, David Bandley imaluunniit ulluinnarni Danimik taaneqartartoq. Taanna nunarsuatsinnut allanut ataatsimiigiartarnermi nammineq timmisartuutiminik angalasartoq.
Nunarsuatsinni taama avannarpasitsigisumi nillertigisumilu golfertarfeqarnera taassuma tupigilluinnarpaa nuannaarutigaluguli.
- Issittup avannamut killeqarfiata kujatinnguani Nuummi golfertarfeqarnera eqqarsaatigalugu tamanna tupinnanngitsuunngilaq nuannerluinnarlunili. Maani golfertarfik kusanaqaaq golferfigalugulu nuannerluinnarluni. Tamanna tulluusimaarutigisariaqarparsi, David Bandley oqarpoq.
Nuummi golferiartup aappaa USA-mi naalagaaffimmi New Yorkimi najugaqarpoq ateqarluni Mike McKaskey-mik. Taanna oqarpoq Nuummi golfertarfik USA-mi golfertarfinnut naleqqiullugu allaaneroqisoq.
- Allaaneroqaaq sapernarnerujussuullunilu. Ingammik eqqarsaatigigaanni golfertarfik manna ujaqqanik qaarsunillu ungaluneqarsimammat. Kisianni maaniippunga ajugaaffiginissarsi pillugu.
Mike McKaskey pualaartoq anertikkajasoorlu nuannaarluni oqarpoq.
Taassuma ikinngutaa angalaqataalu David Bandley usorsisimaarluni piaaralunilu oqarpoq, manna Kalaallit Nunaat open-eqarnerani ajugaanissani naatsorsuutigalugu.
- Greenland Open-imi aatsaat taama ajugaassaanga, David Bandley oqarpoq.
- Isumaqarpit kalaaleq golfertartoq uattut ittoq ajugaaffigisinnaallugu?, quisaaralunga aperaara.
- Ilaana ajugaaffigisinnaavakkit. Qaa maannali ingerlaqqittariaqarpugut tassami maanna unamminitsinni ajorsartigaarnissarsi naatsorsuutigaara.
Amerikami Californiami illoqarfissuarmi Los Angelesimi najugaqartoq, David Bandley taama oqarpoq.
Nuummi angalatitsivimmik Tupilak Travelimik piginnittoq, Henrik Skydsbjerg KNR-imut oqaluttuarpoq, takornariat Nuummut tikittartut ukiuni kingullerni arfineq pingasuni assigiikannersumik amerlassuseqartarsimasut ukioq manna amerleriarsimasut maluginiarsimallugit.
