Amerikami tusagassiorfimmi sulisunik marlunnik toqutsisutut pasisaq imminut aallaavoq
Angut politiinit ujaarineqareerluni biilimini nassaarineqarpoq.
- Politiit biili qanillattorpaat angullu imminut aallaasimasoq nassaralugu. Maanna napparsimavimmut qanittumiittumut aqqunneqarsimalerpoq inuuneralu annaanniarlugu suliarineqarluni, politiit nalunaarummi taama allapput.
Politiit angut toqutsisoqareernerata kingorna akunnerpaalunni malersorpaat. Augustami Politiit naapertorlugit toqutsisimasutut pasisaq tassaavoq angut 41-nik ukiulik Vester Flanagan-imik atilik, taannalu toqutaasut suleqatikoraat.
Tusagassiortoq 24-inik ukiulik Alison Parker assiliisorlu 27-inik ukiulik Adam Ward toqqaannartumik tv-kkut apersuinerup nalaani, nunatsinni ullaaq nalunaaqutaq ullaakkut 8.45 missaanni, aallaaneqarlutik toqutaapput.
Internettimi inuit attaveqaqatigiittarfiini toqutsinermini video angutip ikkussimagaa, tv-kkut nutaarsiassaqartitsivik CNN allappoq.
- Aallaasersornera filmiliaraara, Facebookimi takusinnaavat, Twitterikkut taama allappoq, taakkuli tamarmik maanna peerneqarlutillu matuneqareerput.
Toqutsisutut pasisaq tv-qarfimmi sulisuusimanerarlugu, suliffigisimasaminillu suleqatigisimasaminillu nuannarinninngitsuunerarlugu, Virginiap guvernøriata, Terry McAuliffep tusagassiutinut arlalinnut oqaatigaa.
