Aluu Airlines qulimiguulinnik angallassisalerusupput
Aluu Airlinesimilu tuniniaanermi pisortap qularinngilaa neqeroorutitik atorluarneqarsinnaasut, suleqatigiinnissamimmi isumqatigiinnerata kingornata qulimiguullit nutaaliaasut pisinnaasaqarnerusut periarfissarilerpaat.
Januaarip aallaqqaataani ukiormanna timmisartortitseqatigiiffik pilersinneqartoq Aluu Airlines nunatsinni timmisartuussillutik kiffartuussinissamut anguniagaat qanillattorpoq. Tamanna tuluit timmisartuutileqatigiiffiat suleqatigilerneratigut periarfissaat annertusivoq:
- Bristow Group qulimiguulinnik timmisartuutileqatigiiffinni nunarsuarmi annersaat ilaanniinngikkuni annersarivaat. Taava kiffartuussinissamik isumaqatigiissutinut neqeroorusiornissarput pilersaarutigaarput, Aluu Airlinesimi tuniniaanermi pisortaq, Kuno Fencker taama oqarpoq.
Aamma atuaruk VIDEO Aluu Airlines timmisartornerup akikinnerulernissaanik neriuuteqalersitsivoq
Septembarip qulingani Angallannermut naalakkersuisup saqqummiuppaa kiffartuussinissamut isumaqatigiissusiornerit killiffiat. Kiffartuussinissamullu neqerooruteqartut arlallit maanna isumaqatiginiarnerat aallartilersoq nalunaarutigaat.
Aluu Airlines Bristow Groupikkullu ataatsimoorlutik neqeroorutissaat nunatsinnut periarfissatsialaasoq, Kuno Fenckerip oqaatigaa.
- Timmisinnaanngittoornerit taakkua millisinneqangaatsiassapput, tassami nunarput, ingasammik avannaani ukiup affaa sinnerlugu taartarpoq, taavalu aamma nittaakkajuttarpoq sermernakkajuttarlunilu. Tamakkua tamaasa eqqarsaatigissagaanni pingaariteqarami atortorissaarutit eqqortut tulluartut eqqunnissai, tassanilu uagut sulissutigisatsinni pingaarnerpaavoq.
Aamma atuaruk Aluu Airlines Greenland Express Groupilu timmisartuussinissamut akuerineqartut
Kiffartuussinissamullu isumaqatigiissutissanut naalakkersuisut qanoq piumasaqarnerat apeqqutaassaaq:
- Taanna tigoreeriarutsigu, sukumiinerusumik naatsorsoriarlugit aqqutissat taavalu akit qanorlu annertutigisumik angallatassaqarnersoq, nalunaarsinnaanngussuugut sukumiinerusumik qanorpiaqqinnaaq neqeroorusiorniarnerluta.
Aluu Airlinesip Bristow Groupillu akornganni suli isumaqatigiittoqanngilaq, tamaakkaluartoq timmisartortitseqatigiiffiup pilersaarutaat killiffiat ima siuariaateqartigipput:
- Aluu Airlinesi qulimiguulinnik maanga tikisitsisinnaavoq januaarip aallaqqaataani 2016, Aluu Airlinesimi tuniniaanermi pisortaq Kuno Fencker oqarpoq.
