Allat akiitsui akilerusuppigit?
Tamatumunnga pissutaalluni ineqarnerminnut akiliineq ajortut akiliutissaralui annaaneqartut peqqussut naapertorlugu najugaqarfiit immikkoortortaqarfiini najugaqataannut tassa saniliinut akiligassaq nassiunneqartarmat, tassa ineqarnermut akiliutaasa qaffanneqarnerisigut, Kim Kielsen allappoq peqqussutillu allanngortinnissaa sulissutigerusuppaa.
- Sooq nunatsinni inissianik attartortorpassuit akiliinissaminnut naalagarsiortut nunatsinni inissianik attartortut akiliutinik paarsineq ajortut imaluunniit akiliinissaminnut ajornartorsiortut akiligassaasa amerlaqataannik pillaatitut akiliisittassavavut? Kim Kielsen aperivoq.
- Attartortut ilaasa inissianut attartukkaminnut akiliisinnaannginnerat akileerusunnginneralluunniit patsisigalugu najugaqartunut allanut nammakkiutigineqartariaqanngilaq. Ineqarnerminnut akissaqaraluarlutik akiliineq ajortut imaluunniit akiliinissaminnut aningaasatigut ajornartorsiortut saniliisa akiliiuaannartut nammannagu, pisortat - tassa piginnittut - nammattariaqarpaat, soorlumi tamanna Inatsisartut 2012-imi ukiakkut ataatsimiinnerminni isumaqatigiillutik Naalakkersuisunut suliakkiutigigaat, Kim Kielsen siunnersuumminut atatillugu taama allappoq.