J.T.P: Allannguerusuppunga

Josef Tarrak Petrusseni videoliani ”Tupilak” aalassatsitsingaatsiareersoq immiussaminik albummimik siullermeerluni iTunes Spotify-ilu aqqutigalugit saqqummersitsivoq.

- Allanngueqataarusuppunga. Taavalu rappi nuannaralugu, Tarrak KNR-imut oqarpoq. Taassuma assigiinngisitsisarneq saqqummersitamini ilaatigut eqqartorpaa.

Josef Tarrak Petrussen siunissaq qaninnerusoq eqqarsaatigalugu suniarnerluni nalugallarpaa. Tamaasali misigerusuppai.
- Tamaasa misilinniarpakka. Rap, film qitinnerlu, rappertartoq inuusuttoq oqarpoq.

Saqqummersitaq Tarrak FxGxS-imik (Freedom, God, Stand, aaqq.) qulequtaqarpoq, erinnanik 11-inik imaqarluni. Rappertartut assigiingitsut, soorlu Taatsi aamma Peand-el saqqummersitami ilaapput.

Rappertartoq 17-inik ukiulik maanna Norgemi Olsomiippoq inuusuttut allat peqatigalugit NUIF-iup, Nuummi Inuusuttut Siuarsartut, aaqqissugaanik poetryslamimi peqataajartorluni tusarnaartitsiartorlunilu.