Allakkatigut taasinerit ilanngunneqarsimanngitsut nassaarineqartut
Inatsisartunut qinersinermi, novembarip 28-anni pisumut atatillugu, allakkatigut taasinerit pingasut kisinneqartunullu ilanngunneqarsimanngitsut, Kommuneqarfik Sermersuup Rådhusiani nassaarineqarput.
Allattoq Apollo Jeremiassen
decembarip 23-at 2014 08:45
Taasinerit taakku kisitsinermut ilanngunneqarsimannginnerat, Kommuneqarfik Sermersuumi pisortaanerup, Steffen Ulrich-Lyngep ajuusaarutigaa.
- Allakkatigut taasinerit Inatsisartunut qinersinermi kisitsinermut ilanngunneqarnissaat pillugit angisuumik suliniuteqarpugut, kisiannili tassa nassuerutigisariaqarparput kukkutaartoqarsimasoq, tamannalu utoqqatsissutigissavarput, Steffen Ulrich-Lynge oqarpoq.
Allakkatigut taasinerit pingasut taakku kommunip Qinersinermut atatillugu ataatsimiititaliaanit Qinersinermut aalajangiisartunut nassiunneqarput, taakkulu taasinerit nassaarineqartut qanoq pineqassanersut aalajangissavaat.
