Allakkatigut qinersinissamik qinnuteqarnissamut periarfissaq kingulleq

Kommuninut qinersinissaq qanilliartorpoq, ullut 22-t qaangiuppata qinersisoqartussaalluni. Inuusuttut nunatta avataani ilinniartut akornanni qinersisinnaanissamut ataasinnguarluunniit maannamut qinnuteqarsimannginnera Kommuneqarfik Sermersuumi qinersinermut siulersuisut maluginianngitsuunngilaat.
Allattoq Karsten Sommer
marsip 14-at 2017 09:29
Nutserisoq Mads Lynge

- Inuusuttut peqataaffigisinnaavaat kikkut kommunissaminni aquttuussanersut, taamatullu sunneeqataalluarsinnaapput. Tamat oqartussaaqataaneranni periarfissaq pitsaalluinnartoq iluatinnarluinnartuullunilu, qinersinermi siulersuisut taama oqarput.

Ilinniartut, peqqissartut, folketingimi ilaasortat Kalaallit Nunaatalu sinniisoqarfiani sulisut nallersuunneqarsinnaasullu nunatta avataani najugaqaraluarlutik qinersisussat allattorsimaffiannut ilanngunneqarnissaminnut qinnuteqarsinnaapput, marlunngornerlu marsip ulluisa 14-iat tassaavoq kommuninut qinersisoqarnissaanut sapaatip-akunneri pingasunngornerat, qinersisussat allattorsimaffiannut ilanngunneqarnissamut qinnuteqarnissamut ulloq kingulleq.

Qinnuteqarnissamut immersugassaq ugguuna aaneqarsinnaavoq, kommunilu kingullermik najugaqarfik qinnuteqarfiussaaq, Danmarkimilu illoqarfimmi innuttaasunut sullissivimmi nunaniluunniit allanut aallartitaqarfinnut allakkatigut taasiartupallattoqarnissaa aamma kaammattuutigineqarpoq.

Qinnuteqarfissaq allakkatigullu qinersinissaq killeqanngillat, kommunimili kingusinnerpaamik apriilip ulluisa pingajuanni taamaattoq tigoreerneqarsimassaaq.

Qinersinissaq qanillivallaartinnagu qinnuteqarnissaq, allakkatiguulluunniit qinersinissaq kaammattuutigineqarpoq.